لە ئەنجامی تەقەكردن لە قوتابخانەیەك لە تایلەند زیاترلە 20 كەس بوونە قوربانى

پەیام 

ئەمڕۆ هەینی، لە ئەنجامی تەقەكردن لە قوتابخانەی "دیپسیرین نونپابوری" لە تایلەند، حەوت كەس بە هێرشبەرەكەوە كوژران و 15ی دیكەش بریندار بوون، كە هێرشبەرەكە دوای كردنە ئامانجی قوتابیان و مامۆستاكان، كۆتایی بە ژیانی خۆی هێنا.

بەپێی ڕاپۆرتێكی ئاژانسی ڕۆیتەرز، ترایرۆنگ فیۆففان، وتەبێژی پۆلیسی تایلەند پشتڕاستی كردەوە، كە حەوت كەس لە ڕووداوەكەدا گیانیان لەدەستداوە.

هاوكات لیفتینانت كۆلۆنێل دیشرابی كۆنجی، بەڕێوەبەری پۆلیسی پارێزگای نونپابوری، ئاماژەی بەوە كرد، ڕووداوەكە لە ناوچەی بانگ كرۆی لە باكووری بانكۆكی پایتەخت ڕوویداوە، بكوژەكە خۆی كوشتووە و لەنێو بریندارەكانیشدا مامۆستا و قوتابی هەن.

قوتابییەكی شایەتحاڵ باسی لەوە كرد، كە سەرەتا وایزانیوە دەنگی یارییە ئاگرینەكانە، بەڵام دوای بێدەنگییەكی كورت، تەقەكان دەستیان پێكردووەتەوە.

ئەم هێرشە خوێناوییە لەكاتێكدایە كە لە شوباتی ڕابردووشدا، لە ناوچەی "هات یای" بەهۆی تەقەكردن لەناو قوتابخانەیەكدا مامۆستایەك كوژرا و قوتابییەك بریندار بوو، ئەمەش نیگەرانییەكانی سەبارەت بە سەلامەتی ناوەندەكانی خوێندن زیاد كردووە.