تڕەمپ: بەهێمنى مامەڵە لەگەڵ ئێران دەکەین

پەیام

دۆناڵد ترەمپ ڕایگەیاند واشنتن بە هێمنی مامەڵە لەگەڵ تاران دەکات و لەبری بژاردەی سەربازی، پشت بەو سزایانە دەبەستێت کە ئابووری ئێرانیان تووشی هەڵاوسان و قەیرانێکی قووڵی دارایی کردووە. 
لە لێدوانێکیدا بۆ پێگەی ئەکسیۆس، ترەمپ ئاماژەی پێ کرد کە ئەمریکا تەنها بە نیمچەیی دانوستان دەکات و بەوردی چاودێری دۆخی ئێران دەکات. باسی لەوەش کرد کە تاران بەدەست هەڵاوسانێکی گەورەوە دەناڵێنێت و دۆخی ئابوورییەکەی هێندە خراپە کە تەنانەت توانای پێدانی مووچەی سەربازەکانی نەماوە. 
تڕەمپ، لە هەژماری تایبەتی خۆی لە تۆڕی کۆمەڵایەتیی "تروس سۆشیاڵ"، هێڵکارییەکی بڵاوکردەوە کە تێیدا دابەزینی بەردەوامی بەهای ڕیاڵی ئێرانی بەرانبەر بە دۆلاری ئەمریکی نیشان دەدات و لەسەری نووسیوە: "٥١ ساڵ لە ڕەفتاری خراپ، ئێران هیچ پارەیەکی پێ نەماوە. " هاوکات بەیانى ئەمڕۆ سێنتکۆم ڕاگەیەنراوێکى بڵاو کردەوە و ئاماژەى بۆ ئەوەکردووە لە ئێستادا ٢٠ کەشتى جەنگیی ئەمریکی لە رۆژهەڵاتى ناوەڕاست جێگیرکراون و کاریان سەپاندنى گەمارۆیە لەسەر بەندەرەکانى ئێران، هەروەها راشیگەیاندووە، لەوەتەى گەمارۆى دەریایی لەسەر ئێران سەپێنراوە، ڕێڕەوی نزیکەى ٥٠ کەشتییان گۆڕیوە و دوانیشیان لەکارخستووە.