عێراق.. دوو به‌رپرسی پێشوو به‌ حه‌وت ساڵ زیندانی سزا دران

په‌یام
دەستەی دەستپاکی عێراق سزای حەوت ساڵ زیندانیکردنی بۆ هەر یەک لە تەڵاڵ زەوبەعی، پەرلەمانتاری پێشوو و عەلی به‌هادلی، بریکاری وەزارەتی نەوت دەرکرد، بە تاوانی گه‌نده‌ڵی.
بەپێی ڕاگەیەندراوێکی دەستەکە، لێکۆڵینەوەکان سەلماندوویانە کە قەبارەی قازانجی نارەوا و گه‌نده‌ڵی سامانی تەڵاڵ زوبەیعی گەیشتووەتە نزیکەی ٣٥ ملیار دینار. لەم چوارچێوەیەدا، دادگا بڕیاریداوە ناوبراو پابەند بکات بە گەڕاندنەوەی بڕی ٧٠ ملیار دینار، ئەمە جگە لە جێبەجێکردنی سزای زیندانیکردنەکەی.
لە دۆسیەیەکی دیکەی پەیوەست بە هەمان تاواندا، دادگا سزای زیندانیکردنی بۆ عەلی بەهادلی، بریکاری وەزارەتی نەوت بۆ کاروباری دابەشکردن سەپاندووە. قەبارەی گه‌نده‌ڵی دارایی ئەم بەرپرسە بە نزیکەی ٢٦.٥ ملیار دینار خەمڵێنراوە، و بەپێی بڕیارەکە ناوبراو پابەند کراوە بە بژاردنی ٥٣ ملیار دینار، کە نوێنەرایەتی قەبارەی قازانجە نارەواکە و ئەو پێژماردنە داراییە دەکات کە بەسەریدا سەپێنراوە.