هەوڵى کاراکردنى خزمەتگوزاری (فایڤ جی) لە عێراق و هەرێم دەدرێت

پەیام

وەزیری گەیاندنی عێراق جەخت لە هەوڵەكان بۆ كاراكردنی خزمەتگوزاری (فایف جی) لە سەرجەم پارێزگاكانی عێراق و هەرێم دەكاتەوە.

مستەفا سەنەد، وەزیری گەیاندنی عێراق ڕایگەیاند: بەوپێیەی هەرێم بۆ كاراكردنی خزمەتگوزاری (فایف جی) بە بەراورد بە حكومەتی ناوەندی هەنگاوی پێشوەختەی ناوە، ئێمەش كار دەكەین بۆ ڕێككەوتن لەگەڵیان بۆ ئەوەی ئەم خزمەتگوزارییە لەیەك كاتدا لە هەموو عێراق كارا بكرێت.

مستەفا سەنەد بە ئاژانسی هەواڵی عێراقی ڕاگەیاند: وەزارەت هەندێك كێشەی بچووكی هەڵپەسێردراوی لەگەڵ هەرێمی كوردستان هەیە، وەك كێبڵی ئینتەرنێت كە لە بەسرەوە دێت بۆ ئەورووپا و بە هەرێمی كوردستاندا تێپەڕ دەبێت، چونكە لە كاتی گەیشتنی بە هەرێم پێویستی بە لێكتێگەیشتن لەگەڵ ئەو كۆمپانیایانە هەیە كە لەوێن.

وتیشی: پێویستە عێراق لەبەردەم كۆمەڵگەی نێودەوڵەتیدا یەك بێت، بۆیە دەكرێت لێكتێگەیشتن لە نێوان حكومەتی فیدراڵ و هەرێمدا هەبێت بۆ ئەوەی پەیوەندییە نێودەوڵەتییەكان لەگەڵ وەزارەتی گەیاندنی فیدڕاڵیدا بن.

سەنەد ئاماژەی بەوەش كرد "حكومەتی هەرێم دەستەی گەیاندنی نییە، وەك ئەوەی لە حكومەتی ناوەندی هەیە، ئەمەش وایان لێ دەكات لە كاتی ڕوودانی هەر بارودۆخێكی كتوپڕدا لەبری دەستەكە، پەیوەندی بە وەزارەتی فیدراڵییەوە بكەن".