5 رۆژ پێش ئێستا
196 جار خوێنراوەتەوە
ئایسلەندا.. دەستپێكردنەوەی دانوستان بۆ چوونە نێو یەكێتیی ئەورووپایان ڕەتكرایەوە
پەیام
لە ڕاپرسییەكدا زۆرینەی هاووڵاتیانی ئایسلەندا دەستپێكردنەوەی دانوستان بۆ چوونە نێو یەكێتی ئەورووپایان ڕەت كردەوە.
لە ڕاپرسییەكی چارەنووسسازدا، دەنگدەرانی ئایسلەندا بە ڕێژەی 52% ڕەتیان كردەوە وڵاتەكەیان دەست بە دانوستانەكانی ئەندامبوون لە یەكێتیی ئەورووپا بكاتەوە.
بەپێی ئەنجامە كۆتاییەكانی ڕیفراندۆمەكە كە دوێنێ، شەممە بەڕێوەچوو "كەمپی دژ بە دەستپێكردنەوەی دانوستانەكان سەركەوتنیان بەدەست هێنا و دەنگدەران پاڵپشتی ئەو بۆچوونەیان كرد كە دەڵێت "كەرتی ماسیگری بۆ وڵاتەكەیان هێندە هەستیارە كە ناكرێت بخرێتە مەترسییەوە"، بۆیە بڕیاری مانەوەیان لە دەرەوەی یەكێتییەكە هەڵبژارد و پڕۆژەی حكومەتیان بۆ دەستپێكردنەوەی گفتوگۆكانی ئەندامێتی ڕەت كردەوە.
لایەنگرانی چوونە نێو یەكێتیی ئەورووپا ئاماژەیان بەوە دەكرد كە ئەندامێتی دەبێتە هۆی دابینكردنی ئاسایشی زیاتر لە جیهانێكدا كە بەهۆی جەنگی ئۆكرانیا و هەڕەشەكانی سەرۆكی ئەمریكاوە بۆ لكاندنی دورگەی گرینلاند، دووچاری ناسەقامگیری بووەتەوە.
لای خۆیەوە حكومەت پڕۆسەكەی وەك دەرفەتێكی "ئێستا، یان هەرگیز" وەسف كردبوو.
ئەمەو ئایسلەندا بۆ یەكەمجار لە ساڵی 2009، لە دوای ئەو قەیرانە داراییەی كە زیانێكی زۆری بە ئابوورییە بچووك و هەستیارەكەی گەیاند، داواكاری بۆ چوونە نێو یەكێتیی ئەورووپا پێشكەش كردبوو.
لە تۆڕە کۆمەڵایەتیەکان شەیری بکە