ڕووسیا: وڵاتانى ئەوروپا لە ئۆپڕاسیۆنە سەربازییەكان دژی وڵاتەکەمان بەشدارن

پەیام

ڕووسیا ڕایدەگەیەنێت: هیچ ئاماژەیەك بۆ باشتربوونی پەیوەندییەكانیان لەگەڵ وڵاتانی ئەورووپا لە ئارادا نییە.

دیمیتری پێسكۆڤ، وتەبێژی كۆشكی سەرۆكایەتی ڕووسیا (كرێملن) لە لێدوانێكدا سەبارەت بە ئاستی پەیوەندییەكانی ئێستای ڕووسیا و ئەورووپا وتی: لە ئێستادا هیچ هۆكارێك بۆ گەشبینی بەدی ناكەم، چونكە نەوەی ئێستای سیاسییەكانی نێو دەسەڵات لە ئەورووپا، نەك تەنیا لە لێدوانەكانیاندا، بەڵكوو بە كردەوەش پەنا بۆ هەڵوێستی ڕووبەڕووبوونەوە لەگەڵ ڕووسیا دەبەن.

پێسكۆڤ جەختیشی كردەوە، وڵاتانی ئەورووپا تەواوی توانا سەربازییەكانی خۆیان كۆ كردووەتەوە و دژی ڕووسیا ئاڕاستەیان كردووە و بە شێوەیەكی ڕاستەوخۆ لە ئۆپڕاسیۆنە سەربازییەكان دژی ڕووسیا بەشدارن.

پێسكۆڤ ئاماژەی بەوەش دا "پێویستە بە باشی لەو ڕاستییە تێبگەین كە بێگومان دەبێت بۆ بنیاتنانی پەیوەندییەكان بە كراوەیی بمێنینەوە و هەر واش ماوینەتەوە، بەڵام دەبێت بە وردی بزانین مامەڵە لەگەڵ كێدا دەكەین؟!".

دوێنێ، هەینیش، میخائیل گالۆزین، جێگری وەزیری دەرەوەی ڕووسیا، ڕایگەیاندبوو: ئەورووپا دەیەوێت گفتوگۆ لەگەڵ ڕووسیا تەنیا بۆ ئەوە بەكار بهێنێت تا مۆڵەتێكی كاتیی بە كیێڤ بدات بۆ هەناسەدان و خۆڕێكخستنەوە لە بەرەكانی جەنگدا.