5 رۆژ پێش ئێستا
211 جار خوێنراوەتەوە
ئاماری گیانلەدەستدان بە هۆی لافاوەکەی نیپاڵ گەیشتە ٦١٦ کەس
پەیام
ژمارەی ئەو کەسانەی لە لافاوەکەی ناوچەی ڕاسوا و دەوروبەری ناوچە سنوورییەکانی نیپاڵ لەگەڵ چین گیانیان لەدەستداوە، بۆ ٦١٦ کەس بەرزبووەتەوە.
بەهۆی ئەو کارەساتەی لە ناوچەکانی نزیک لە سنووری چین لە نیپاڵ ڕوویدا، هەوڵەکانی ڕزگارکردن بەردەوامە.
بە گوێڕەی هەواڵێکی CNN لە زمان بەرپرسانی پۆلیسی ناوچەکە، ژمارەی گیانلەدەستدان گەیشتووەتە ٦١٦ کەس.
ئەو بەرپرسانە ڕاشیانگەیاندووە کە دوو هەزار و ٣٠١ کەس بە هۆی کارەساتەکەوە بریندار بوون و تا ئێستاش هیچ زانیارییەک لەبارەی چارەنووسی دوو هەزار و ٥٠٠ کەس نییە کە بەشێکیان بیانین.
ڕۆژی ٢٦ی ئاب لە ئاکامی لافاوێکی وێرانکەر دەیان پرد ڕووخاون، زیان بە ڕێگاکان گەیشت. بۆ کارەکانی گەڕان و ڕزگارکردن هێلیکۆپتەر ڕەوانەی ناوچەکە کراوە.
ناوەندی ڕووپێوی جیۆلۆجیی ئەمریکا (USGS) ڕایگەیاند بوومەلەرزەیەک بە گوڕی ٥.٢ لە ناوچەکەدا ڕوویداوە. بە پێی زانیارییەکانی دامەزراوەی نێودەوڵەتی پەرەپێدانی چیاکان کە ناوەندەکەی لە کاتماندۆیە، ئەوە توانەوەی سەهۆڵبەندان و هەرەسهێنانی بەفر لە ناوچە شاخاوییەکانی لێ کەوتووەتەوە و بووەتە هۆکاری هەستانی لافاو.
لە تۆڕە کۆمەڵایەتیەکان شەیری بکە