ئەمریكا داوا لە حزبوڵڵای لوبنان دەكات چەكەكانی ڕادەست بكات

پەیام

باڵیۆزخانەی ئەمریكا لە لوبنان داوا لە حزبوڵڵا دەكات ئامادەكاری بۆ ڕادەستكردنی چەكەكانی بكات.

لە پۆستێكدا ‏لە تۆڕی ئێكس، باڵیۆزخانەی ئەمریكا لە لوبنان ڕایگەیاند: ئەم هەنگاوە لە بەرژەوەندی خەڵكی لوبناندایە و ڕێگە بۆ واشنتن خۆش دەكات تا لەنێوان حزبوڵا و ‏دەوڵەتی لوبناندا نێوەندگیری بۆ نزیككردنەوەی دیدگا جیاوازەكان سەبارەت بە داهاتووی ئەو وڵاتە بكات.

وتەبێژی وەزارەتی دەرەوەی ئەمریكاش ئاماژەی بەوە كردووە كە بەپێی "چوارچێوەی سێقۆڵی"، تەنها حكومەتی لوبنان لایەنی شەرعییە بۆ ‏گفتوگۆكردن لەسەر داهاتووی وڵات.

وتەبێژەكە ڕایشیگەیاندووە: دەیەوێت لوبنان وڵاتێكی ئارام و خاوەن سەروەری بێت، بەڵام ‏بەدیهاتنی ئەمەش پێویستی بە داماڵینی چەكی حزبوڵا هەیە. 

هەروەها ڕایگەیاند: حزبوڵا تا ئێستا ئامادەی گفتوگۆ نییە نە لەگەڵ دەوڵەتی لوبنان، نە لەگەڵ ئێمە و نە لەگەڵ ئیسرائیلیش، چونكە فەرمان لە ‏ئێران وەردەگرێت.

ئەم هەڵوێستەی ئەمریكا دوای ئەوە دێت كە دوێنێ هەینی، نەعیم قاسم، ئەمینداری گشتیی حزبوڵا، جارێكی دیكە ڕێككەوتنی چوارچێوەی نێوان لوبنان ‏و ئیسرائیلی ڕەت كردەوە و ڕایگەیاند كە حزبوڵا خۆی بەدەستەوە نادات وتیشی: حزبوڵڵا دژی ڕێككەوتنی چوارچێوەیە.