ئەکسیۆس: ئەمریکا بەنیازە ناوبەناو هێرشی ئاسمانیی بکاتە سەر ئێران

پەیام

پێگەی هەواڵیی "ئەکسیۆس" لەسەر زاری بەرپرسانی ئەمریکییەوە ئاشکرای کرد کە دۆناڵد ترامپ تاوتوێی ئاڕاستەکردنی لێدانی سەربازیی ناوبەناو بۆ سەر ئێران دەکات. 

بەپێی ڕاپۆرتەکەی ئەکسیۆس، سەرۆکی ئەمریکا دۆناڵد ترامپ لەگەڵ یاریدەدەرە باڵاکانیدا تاوتوێی ئەگەری ئەنجامدانی هێرشی سەربازیی سنووردار و ناوبەناو لە گەرووی هورمز دەکات. بڵاویشیکردوەتەوە، ئامانج لەم ڕێکارە سەربازییانە ڕێگریکردنە لە ئێران لە دووبارە بنیاتنانەوەی توانا ڕاداری و مووشەکییەکانی کە بۆ بەئامانجگرتنی کەشتییە نەوتییەکان بەکاریان دەهێنێت. 

لەبەرانبەردا، مەسعـود پزیشکیان، سەرۆککۆماری ئێران ڕایگەیاند پابەندی ئەمریکا بەو ڕێکەوتننامەیەی واژووی سەرۆکی ئەمریکای لەسەر بوو، زیاتر لە دوو هەفتەی نەخایاند. ناوبراو ئاماژەی بەوەش کرد کە وڵاتەکەی خاوەنی تۆمارێکی شەرەفمەندانەیە لە جێبەجێکردنی پەیماننامە نێودەوڵەتییەکاندا، بە پێچەوانەی ئەمریکاوە. 

پزیشکیان جەختیشی کردەوە کە ئەگەر واشنتن بگەڕێتەوە سەر جێبەجێکردنی بەڵێنەکانی لە چوارچێوەی لێکتێگەیشتنەکەدا، تاران بە شێوەیەکی دەستبەجێ هەمان هەنگاو دەنێتەوە و بەڵێنەکانی جێبەجێ دەکاتەوە.