ئەمریکا... ١٦٣ منداڵ لە چنگی باندەکانی بازرگانی بە مرۆڤ ڕزگار کران

پەیام
لە ئۆپەراسیۆنێکی پێنج ڕۆژەدا لە ویلایەتی فلۆریدای ئەمریکا، توانراوە ١٦٣ منداڵی ونبوو بدۆزرێنەوە کە لە لایەن باندەکانی بازرگانیکردن بە مرۆڤەوە ڕفێنرابوون. 

جەیمس ئوسمایەر، داواکاری گشتیی فلۆریدا، رایگەیاندووە، ئۆپەراسیۆنەکە بە ناوی "قەڵغانی سەرتاسەریی ویلایەت" بەڕێوەچووە و تەمەنی منداڵە دۆزراوەکان لەنێوان دوو مانگ بۆ ١٧ ساڵاندایە. لە ڕێگەی زانیارییە هەواڵگری و مەیدانییەکانەوە، منداڵەکان لە چەندین شاری ناوخۆی ویلایەتەکە وەک تامپا بەی، مەیامی و جاکسۆنڤیل دۆزراونەتەوە. هاوکات ژمارەیەکی دیکەیان لە شەش ویلایەتی ئەمریکا و ١٢ وڵاتی جیهان، لەوانەش بەڕازیل، کەنەدا و ئیتاڵیا دۆزراونەتەوە و دەستبەجێ گواستراونەتەوە بۆ ناوەندەکانی چاودێریی کۆمەڵایەتی و تەندروستی. 

داواکاری گشتی فلۆریدا راشیگەیاندووە، کۆی منداڵە قوربانییەکان لەلایەن باندەکانی بازرگانیکردن بە مرۆڤەوە لە ناوخۆی ئەمریکادا و لە ویلایەتە جیاوازەکانەوە ڕفێنراون و  ئەوەش پشتڕاست کراوەتەوە کە بەشێک لە منداڵەکان ڕووبەڕووی توندوتیژی، پشتگوێخستن و قۆستنەوە بوونەتەوە. 

لە میانی ئۆپەراسیۆنەکەدا چەندین کەس بە تۆمەتی دەستدرێژیی سێکسی بۆ سەر مێردمنداڵان و ڕفاندن دەستگیرکراون، پێشبینیش دەکرێت لە ڕۆژانی داهاتوودا هەڵمەتی دەستگیرکردنەکان بەردەوام بێت.