چوارچێوەی هەماهەنگی وادەی تەواوکردنی کابینەی حکومەت دیاری دەکات

چوارچێوەی هەماهەنگی ڕایگەیاند گفتوگۆکانی تەواوکردنی کابینەی حکومەت لەم هەفتەیەدا یەکلا دەکرێنەوە و هەفتەی داهاتوو بە مەبەستی متمانەپێدانیان ڕەوانەی پەرلەمان دەکرێن. 

بەپێی ڕاگەیەندراوێکی فەرمی، چوارچێوەی هەماهەنگی کۆبوونەوەی ئاسایی ژمارە ٢٩٢ ی خۆی لە نووسینگەی هادی عامری و بە ئامادەبوونی عەلی زەیدی، سەرۆکوەزیرانی عێراق ئەنجامدا، کە تێیدا سەرۆکوەزیران ئاماژەی بەوە کرد گفتوگۆکانی پەیوەست بە تەواوکردنی کابینەی وەزاری لەماوەی ئەم هەفتەیەدا کۆتاییان دێت و هەفتەی داهاتوو پێشکەشی ئەنجومەنی نوێنەران دەکرێن بۆ دەنگدان؛ هاوکات لەسەر ئاستی پەرلەمانیش تاوتوێی خێراکردنی هەنگاوەکانی پەسەندکردنی یاسا گرنگەکان کرا، کە لە پێشەنگیاندا پڕۆژەیاسای بودجەی گشتی و یاسای حەشدی شەعبین. 

هەر لە میانی کۆبوونەوەکەدا، لێکەوتە دارایی و ئابوورییەکانی جەنگی ناوچەکە و پەککەوتنی جووڵەی کەشتیوانی لە گەرووی هورمز لەسەر عێراق تاوتوێ کران؛ هاوکات فیراس موسڵماوی، وتەبێژی فراکسیۆنی «ئاوەدانکردنەوە و گەشەپێدان» ئاشکرای کرد کە هێزەکانی چوارچێوەی هەماهەنگی گەیشتوونەتە قۆناغی یەکلاکردنەوەی ناوی کاندیدەکانی پشکی خۆیان بۆ وەزارەتە بەتاڵەکان و بڕیارە فراکسیۆنەکانی دیکەش بەم نزیکانە لیستی کاندیدەکانیان ڕادەستی سەرۆکوەزیران بکەن.