گروپە چەكدارەكانی عێراق بە مەرج چەكەكانیان دەخەنە ژێر فەرمانی دەوڵەت

پەیام 

وتەبێژی ئەنجومەنی باڵای ئیسلامی ڕایگەیاند، كە گروپە چەكدارەكان ئامادەن بۆ گفتوگۆ سەبارەت بە سنوورداركردنی چەك و گۆڕینیان بۆ هێزێكی دەوڵەتی، بەو مەرجەی سەروەریی تەواوی عێراق بچەسپێت و دۆسیەی هێزە بیانییەكان و ئاسایشی ئاسمانی و سنوورەكان چارەسەر بكرێن.

عەلی دیفاعی، وتەبێژی ئەنجومەنی باڵای ئیسلامی عێراق ڕایگەیاند، كە گروپە چەكدارەكان دژی گفتوگۆكردن نین لەسەر پرسی سنوورداركردنی چەك، بەڵكو گۆڕینی چەكەكانیان بۆ هێزێكی سەر بە دەوڵەت گرێ دەدەن بە بەدیهێنانی "سەروەریی گشتگیر و تەواوەتی". 

عەلی دیفاعی،  ڕوونی كردەوە كە ئەم هەنگاوە پێویستی بە جیاكردنەوەی هەڵگرانی چەك لە ڕێكخراوە سیاسییەكان، سەرژمێری و ڕێكخستنی چەكەكان و بەستنەوەیان بە فەرماندەی گشتیی هێزە چەكدارەكانەوە هەیە، لەگەڵ دەركردنی یاسای خانەنشینی و داڕشتنی پەیكەری رێكخستنی حەشدی شەعبی.

ناوبراو ئاماژەی بەوەش كرد، بەپێی گفتوگۆكانیان، گروپەكان ئامادەن چەكەكانیان بخەنە خزمەت دەوڵەت، بەو مەرجەی پرسی بوونی هێزە بیانییەكان و كۆنترۆڵكردنی سنوور و ئاسمانی عێراق چارەسەر بكرێت.

وتیشی، ئەگەر ئەم مەرجانە جێبەجێ بكرێن، شتێك بە ناوی  گروپە چەكدارەكان نامێنێت؛ بە جۆرێك سەركردە سیاسییەكان دەچنە ناو كایەی سیاسی و فەرماندە مەیدانی و شەڕكەرەكان لە ناو حەشدی شەعبیدا وەك هێزێكی سەربازیی فەرمی دەمێننەوە، چونكە گروپەكان لە پرەنسیپی ملكەچبوونی چەك بۆ فەرماندەی گشتی تێدەگەن.