واشنتۆن داوای ڕێككەوتنێكی نوێ و گشتگیرتر لەگەڵ ئێران دەكات

پەیام 

واشنتۆن گەڕانەوە بۆ ڕێككەوتنە كۆنەكەی لەگەڵ ئێران ڕەت كردەوە و داوای ڕێككەوتنێكی نوێ و گشتگیرتر دەكات.

ڕۆژنامەی "فاینانشیاڵ تایمز" لە زاری چەند سەرچاوەیەكی ئاگادارەوە بڵاوی كردەوە، ئیدارەی دۆناڵد ترەمپ دەیەوێت تێپەڕ بێت لە ڕێككەوتنە كۆنەكانی لەگەڵ تاران و داوای ڕێككەوتنێكی نوێ دەكات كە دۆسیەی ئەتۆمی و گەرووی هورمز لەخۆ بگرێت. 

جەی دی ڤانس، جێگری سەرۆكی ئەمریكا جەختی كردەوە كە هیچ دانوستانێك ئەنجام نادرێت تا ئەو كاتەی ئێران هێرشەكانی بۆ سەر كەشتییەكان لە گەرووی هورمز ڕادەگرێت.

لە لایەكی دیكەوە، نێوەندگیرەكان لە هەوڵدان بۆ هێشتنەوەی كەناڵە ناڕاستەوخۆكانی پەیوەندی بە كراوەیی بۆ ئامادەكردنی چوارچێوەیەك بۆ گفتوگۆی داهاتوو. 

واشنتۆن دەیەوێت گەرووی هورمز بە كراوەیی بمێنێتەوە بێ گوێدانە ئەنجامی دانوستانەكانی تاران و مەسقەت. 

لە بەرامبەردا، سەرۆكی دەسەڵاتی دادوەری ئێران، غولام حوسێن موحسنی ئاژەیی ڕایگەیاند كە وڵاتەكەی ناچێتە ژێر هیچ فشارێك و ئاماژەی بەوە كرد كە جیهان بەرەو سیستمێكی نوێ دەچێت كە چین تێیدا ڕۆڵێكی كاریگەری دەبێت.