ئێران.. دیمەنێكی ژیریی دەستكردی بەكارهێنانی چەكی ئەتۆمیی كاردانەوەی لێدەكەوێتەوە

پەیام

لەكاتێكدا تا ئەم ساتەیش لە ئاستی سەركردایەتی وڵاتدا بە حەرام و قەدەغەكراو دادەنرێت، بەڵام بڵاوكردنەوەی دیمەنێكی بەكارهێنانی چەكی ئەتۆمیی لەلایەن ئێرانەوە، تۆڕە كۆمەڵایەتییەكان دەتەنێت.

لە دیمەنەكەدا كە بە ژیری دەستكرد دروست كراوە، موجتەبا خامنەیی ڕێبەری باڵای ئێران دەردەكەوێت كە واژوو لەسەر نووسراوێك لەنێو فایلێكدا دەكات كە ناوی سوپای ئەتۆمیی كۆماری ئیسلامیی ئێرانی لێ نوسراوە.

پاشان لە دیمەنەكدا موحسین ڕەزایی سكرتێری گشتیی ئەنجوومەنی باڵای ئاسایشی نەتەوەیی ئێران دەردەكەوێت كە لە ڕێگەی تەلەفۆنەوە هەواڵی واژووكردنەكەی ڕێبەری باڵا بە فەرماندەیەكی سەربازی دەدات و فەرمانی دەستپێكردنی هەڵدانی مووشەكە ئەتۆمییەكەی پێ دەدات، دواتریش لە مەیداندا مووشەكێك هەڵدەدرێت كە هێمای چەكی ئەتۆمیی پێوەیەوە و یەكەمین تاقیكردنەوەی گەرمی مووشەكێك كە هەڵگری كڵاوەی ئەتۆمیی تاریقە ئەنجام دەدرێت و پێنج ژمارەی پێچەوانە دەژمێردرێت و پاشان دەتەقێنرێت.

بڵاو كردنەوەی ئەم دیمەنە لەلایەن كەناڵێكەوە كە دژبەری حكومەت نییە و بە نیمچەفەرمی ناو دەبرێت، دەنگۆی جیاوازی بەدوای خۆیدا هێناوە بەتایبەت كە ئەگەری سەرهەڵدانەوەی جەنگ كراوەیە.

ئەوەیش لە كاتێكدایە كە تا ئەم ساتەیش بەدەستهێنانی چەكی ئەتۆمیی لەلایەن ئێرانەوە لەسەر فەتوای ڕێبەری پیشووی وڵاتەكە بە حەرامی شەرعی دانراوە و چەندین جاریش لەلایەن بەرپرسانی باڵاوە جەختی لەسەر كراوەتەوە.