ئارسیناڵ کار بۆ نوێکردنەوەی گرێبەستی سێ یاریزانە سەرەکییەکەی دەکات

پەیام سپۆڕت - مەڕوان تاڵیب

یانەی ئارسیناڵ هەنگاوی جدی ناوە بۆ پاراستنی کۆڵەکە سەرەکییەکانی پێکهاتەکەی و لە ئێستادا گفتوگۆکانی بۆ نوێکردنەوەی گرێبەستی سێ یاریزانی دەکات.

 بەپێی زانیارییەکانی میدیاکانی نزیک لە گەنەرز، لە ئێستادا یانەکە کار لە نوێکردنەوەی بۆندی هەریەکە لە مارتن ئۆدیگارد، دێکلان ڕایس و یۆرین تیمبەر دەکات و گەیشتووەتە قۆناغێکی باش.

ئیدارەی ئارسیناڵ دەیەوێت بە واژووکردنی گرێبەستە نوێیەکان، ئەم سێ یاریزانە لە چاوی یانە گەورەکانی دیکە بپارێزێت، بەو پێیەی ئۆدیگارد، ڕایس و تیمبەر وەک ڕەگەزە سەرەکییەکانی پڕۆژەکەی مایکڵ ئارتێتا دەبینرێن و مانەوەیان بۆ ماوەیەکی درێژخایەن گرنگییەکی زۆری هەیە بۆ کێبڕکێکردن لەسەر نازناوە ناوخۆیی و ئەوروپییەکان.

سەرچاوەکان ئاماژە بەوە دەکەن کە گفتوگۆکان لە ئاراستەیەکی دروستدا دەڕۆن و پێشبینی دەکرێت لە ئایندەیەکی نزیکدا بە فەرمی نوێکردنەوەی گرێبەستەکانیان ڕابگەیەنرێت.