2 کاتژمێر پێش ئێستا
113 جار خوێنراوەتەوە
بانكی ناوەندی: سەرجەم سزاكانی سەر كەرتی بانكی عێراق لابراون
پەیام
پارێزگاری بانكی ناوەندیی عێراق ڕایگەیاند، سەرجەم سزاكانی سەر كەرتی بانكی لابراون و لەمڕۆ بەدواوە هیچ سزایەكی نێودەوڵەتی لەسەر بانكەكان نەماوە.
نزار ناسر حوسێن، پارێزگاری بانكی ناوەندی لە دیدارێكدا لەگەڵ پسپۆڕانی ئابووری جەختی كردەوە كە بەهۆی بەردەوامیی پرۆسەی چاكسازی لە كەرتی بانكیدا بە هەماهەنگی لەگەڵ كۆمپانیای نێودەوڵەتیی "ئۆلیڤەر وایمان"، متمانەی نێودەوڵەتی بە تەواوی بۆ بانكەكان گەڕاوەتەوە و سەرجەم سزاكان هەڵگیراون.
هاوكات دڵنیایی دا كە زۆرینەی پارەی سپاردەكاران لە "بانكی ئەلتەیف" پارێزراوە و لە ئەگەری هەر كورتهێنانێكدا بانكی ناوەندی دەستوەردان دەكات، ئاماژەی بەوەش كرد، وەبەرهێنانەكانی عێراق لە ئەمریكایە وەك تاكە پەناگەیەكی پارێزراو كە پارێزبەندیی تەواوی پێدراوە.
دەربارەی سیاسەتی دراو و بارستەی نەختینەیی، پارێزگاری بانكی ناوەندی ڕوونی كردەوە، كە بڕی نەختینەی چاپكراو 107 تریلیۆن دینارە و نزیكەی 40 تریلیۆنی لە بازاڕەكاندایە.
نزار ناسر دووپاتی كردەوە كە بڕیاری گۆڕینی دراو لە دەسەڵاتی بانكی ناوەندیدایە، بەڵام سڕینەوەی سفرەكان پێویستی بە دەركردنی یاسایە لە پەرلەمان، لەگەڵ هەبوونی دەستپێشخەریی نوێی پێدانی قەرز بۆ پاڵپشتیكردنی پڕۆژە ستراتیژییەكان بە هەماهەنگی لەگەڵ كەرتی تایبەت.
لە تۆڕە کۆمەڵایەتیەکان شەیری بکە