کەناری رۆژاوا... بە چەقۆ هێرش کرا و کەسێک بە سەختی بریندار کرا

پەیام
لەنزیک شاری نابلس، زایۆنییەکی نیشتەجێبوو بە چەقۆ بەسەختی بریندار کرا و هێرشبەرەکەش شەهیدبوو. لە کاردانەوەی ئەمەشدا، وەزیری بەرگریی ئیسرائیل فەرمانی ئامادەکاری بۆ "جەنگێکی گشتگیر" لە کەناری ڕۆژاوا دا. 
بەپێی ڕاپۆرتەکانی سوپا و دەزگاکانی ڕاگەیاندنی ئیسرائیل، لە خاڵێکی نیشتەجێبوونی نزیک گوندی ئۆسرین لە باشووری شاری نابلس لە باکووری کەناری ڕۆژاوا، کەسێکی فەلەستینی پاش گفتوگۆکردن لەگەڵ نیشتەجێبوویەکی زایۆنیدا، بە چەقۆ هێرشی کردووەتە سەری و دواتر بە ئۆتۆمبێلێک لە شوێنی ڕووداوەکە هەڵاتووە. کەناڵی ١٢ی ئیسرائیلی بڵاویکردەوە کە بریندارەکە بەهۆی بەرکەوتنی چەندین چەقۆوە بە هێلیکۆپتەر ڕەوانەی نەخۆشخانە کراوە و دۆخی تەندروستیی مەترسیدارە. 
دوای ڕووداوەکە، پۆلیس و هێزێکی زۆری سوپای ئیسرائیل گەیشتنە ناوچەکە و دەستیان بە ئۆپەراسیۆنێکی بەرفراوانی گەڕان و پشکنین کرد بۆ دۆزینەوەی هێرشبەرەکە. بەپێی زانیارییەکان سوپای ئیسرائیل قەدەغەی هاتووچۆ و گەمارۆی ئەمنیی بەسەر چەند گوندێکی ڕۆژهەڵاتی شارەکەدا سەپاندووە. 
دواتر، سەرچاوە ئیسرائیلییەکان ڕایانگەیاند کە سوپا هێرشبەرەکەی کوشتووە، ئەوەش دوای ئەوەی لە ڕێگەی ئەو مۆبایلەوە ناسنامەکەی ئاشکرا کرا کە لە شوێنی ڕووداوەکەدا بەجێی هێشتبوو.