له‌لایه‌ن ٧٧ وڵاته‌وه‌ بایكۆتی وتاری سه‌ركرده‌یه‌ك كرا

بایکۆتکردنی وتارەکەی نەتانیاهۆ لەلایەن ٧٧ شاندەوە کاردانەوەی بەرفراوانی لێکەوتەوە.
چوونەدەرەوەی بەکۆمەڵی ٧٧ شاند لە هۆڵی کۆمەڵەی گشتیی نەتەوە یەکگرتووەکان پێش دەستپێکردنی وتارەکەی سەرۆک وەزیرانی ئیسرائیل، دەنگدانەوە و کاردانەوەی بەرفراوانی لەسەر ئاستی جیهان دروست کرد. 
پێش پێشکەشکردنی وتارەکەی سەرۆک وەزیرانی ئیسرائیل بنیامین نەتانیاهۆ، نوێنەرانی ٧٧ دەوڵەت هۆڵەکەیان جێهێشت یان ئامادەی دانیشتنەکە نەبوون، دیمەنێک کە ناڕەزایەتی ناو هۆڵەکە و خۆپیشاندانی بەردەم گۆڕەپانی تایمز سکوێری لە نیویۆرک بەدوای خۆیدا هێنا. میدیاکانی ئیسرائیل بایەخێکی زۆریان بە ڕووداوەکە دا؛ کەناڵی ١٤ هەنگاوەکەی بە "توفکردن لە ڕووی ئیسرائیل" و ڕۆژنامەی یەدیعۆت ئەحرۆنۆت بە "ناڕەزایەتییەکی دراماتیکی" ناوزەدیان کرد، هاوکات ڕۆژنامەی هائارتس وتارەکەی بە دووبارە لەقەڵەم دا کە تەنیا ئاراستەی لایەنگرانی ڕاستڕەوی خۆی و سەرۆکی ئەمریکا دۆناڵد ترامپ کرابوو لە ناو گۆشەگیرییەکی دیپلۆماسیی قووڵدا. 
لە ئاستی نێودەوڵەتیشدا، ڕۆژنامەی گاردیان ئاماژەی بەوە کرد نەتانیاهۆ لە وتارەکەیدا بەڵێنی تەواوکردنی ئەرکەکەی لە غەززە داوە لە کاتێکدا شاندەکان وەک ناڕەزایەتی دەرچوون، هەروەها ڕۆژنامەکانی واشنتن پۆست و ئیندیپێندنت ڕووداوەکەیان بە کاردانەوەیەکی توندی جیهانی دژ بە سیاسەتەکانی ئیسرائیل وەسف کرد.