دوای مەرگی یارا ئاریان هۆشداریی لە "مەترسیی بینای خوێندنگاكان" دەدرێت

پەیام

دوای گیانلەدەستدانی كچە خوێندكارێك بەناوی (یارا ئاریان) لە قوتابخانەیەكی تایبەتدا، پەروەردەی سلێمانی لە ڕێگەی چەند گشتاندنێكەوە داوای لە سەرجەم ناوەندە حكوومی و ناحكوومییەكان كرد بەپەلە و لەپێناو پاراستنی گیانی قوتابییاندا پێداچوونەوە بۆ مەرجەكانی سەلامەتیی بیناكانیان بكەن.

بەپێی نووسراوەكانی بەشی بیناسازی لە بەڕێوەبەرایەتیی گشتیی پەروەردەی سلێمانی، كە دوابەدوای كارەساتی دڵتەزێنی برینداربوون و گیانلەدەستدانی خوێندكار (یارا ئاریان) لە قوتابخانەیەكی ناحكوومی دەركراون، هۆشداریی بەپەلە لەبارەی "مەترسیی بینای باخچە و خوێندنگاكان" دراوە.

گشتاندنەكان بە جیا ئاراستەی گشت باخچە، قوتابخانە، كۆمەڵگە و كۆمەڵگە نێودەوڵەتییە ناحكوومییەكان، و هەروەها پەروەردەكانی ڕۆژئاوا، ڕۆژهەڵات، سەیدسادق، شارەزوور، قەرەداغ، پێنجوێن، چەمچەماڵ، شارباژێر، دووكان، دەربەندیخان كراون، تا دەستبەجێ ئاراستەی تەواوی ناوەندە فەرمییە حكوومییەكانی بكەن.

لە ڕێنماییەكاندا داوا لە سەرجەم ئەو ناوەندانە كراوە بەپەلە بەدواداچوون بۆ مەرجەكانی سەلامەتی (سەیفتی) لە گشت پێكهاتەكانی باڵەخانەكانیاندا ئەنجام بدەن و بەڕێوەبەرایەتیی گشتی لێ ئاگادار بكەنەوە، لەپێناو پاراستنی گیانی خوێندكاران و دووربوون لە هەر زیانێك.

دەركردنی ئەم بڕیار و گشتاندنە دوابەدوای ئەوە دێت كە هەفتەی ڕابردوو ڕۆژی سێشەممە، لە ڕووداوێكی نەخوازراودا كچە قوتابییەك بەناوی (یارا ئاریان) لە قوتابخانەیەكدا بەر شوشەیەك كەوت و بریندار بوو، دواتریش بەهۆی سەختیی برینەكەیەوە گیانی لەدەستدا.