خه‌لیل.. حه‌ره‌می ئیبراهیمی داخرا

پەیام
دەسەڵاتدارانی ئیسرائیل بەبۆنەی جەژنەکانی جووەوە حەرەمی ئیبراهیمییان لە شاری ئەلخەلیل بەڕووی فەلەستینییەکاندا داخست، هاوکات لەگەڵ ئەوەشدا جووە داگیرکەرەکان هەڵکوتایە سەر حەوشەکانی مزگەوتی ئەقسا و لەلایەن پۆلیسەوە پارێزگارییان لێکرا. 
بەپێی زانیارییەکانی میدیای فەلەستینی، داخرانی حەرەمی ئیبراهیمی تا ئێوارەی ڕۆژی چوارشەممە بەردەوام دەبێت. ئەمەش لە کاتێکدایە کە سەرلەبەیانی ئەمڕۆ دووشەممە، ژمارەیەک لە دانیشتوانی ئۆردوگا جوولەکە نشینەکان لەژێر پاراستنی توندی پۆلیسدا چوونە ناو حەوشەکانی مزگەوتی ئەقساوە و پەلاماری فەلەستینییە نوێژخوێنەکانیان دا. 
لە لایەکی دیکەوە، فەرمانگەی ئەوقافی ئیسلامی لە شاری قودس ڕایگەیاند، ڕۆژی یەکشەممە زیاتر لە ١٥٠٠ لە  جووە داگیرکەرەکان کە نیشتەجێی ئۆردوگاکانن چوونەتە ناو مزگەوتی ئەقسا و لەژێر پاسەوانیی هێزەکانی پۆلیسدا ڕێوڕەسمی تەلموودییان ئەنجامداوە، هاوکات ڕێکارە ئەمنییەکان بۆ چوونەژوورەوەی نوێژخوێنانی فەلەستینی بەڕێژەیەکی بەرچاو توندتر کراونەتەوە. 
ساڵانە مزگەوتی ئەقسا لەگەڵ دەستپێکردنی جەژنەکانی جوودا ڕووبەڕووی ئەم جۆرە پەلاماردانە دەبێتەوە و، لە ئاکامدا پێکدادانی توندی نێوان فەلەستینییەکان و  جووە داگیرکەرەکانی لێ دەکەوێتەوە. 
ئەمساڵ جیاواز لە ساڵانی پێشوو لەگەڵ پەلاماردانی مزگەوتی ئەقسا، حەرەمی ئیبراهیمییان بەڕووی مسوڵماناندا داخستووە کە چوارەم پیرۆزترین شوێنە لای مسوڵمانان و شوێنێکی پیرۆزیشە لای مەسیحییەکان.