1 کاتژمێر پێش ئێستا
49 جار خوێنراوەتەوە
ئێران: ناوچەكە ناسەقامگیر بێت، لێكەوتەكەی بۆ هەمووان دەبێت
پەیام
فەرماندەی سوپای ئێران هۆشداری دەدات ئەگەر ناوچەكە ناسەقامگیر بێت، لێكەوتەكەی بۆ هەمووان وەك یەك دەبێت.
ئەمیر حاتەمی، فەرماندەی گشتیی سوپای ئێران لە فێستیڤاڵی نیشتمانیی سەربازی ئێرانیدا ڕایگەیاند: جەنگی سەپێنراو لە قۆناغێكی چارەنووسسازدایە و تا ئێستا كۆتایی نەهاتووە.
ناوبراو ئاماژەی بەوە كرد "دوژمن لە لێكدانەوەكانیدا هەڵەی كرد كە پێی وابوو بە تیرۆركردنی ڕێبەر و فەرماندەكان، ئێران تووشی داڕمان دەبێت، بەڵام سوپا ئامادەی وەشاندنی گورزی سەختە".
حاتەمی هۆشداری دایە وڵاتانی ناوچەكە و جیهان كە ئەگەر بڕیار بێت ناوچەكە نائارام بێت، ئەم نائارامییە بۆ هەمووان دەبێت وتیشی: ناكرێت ئێران لە بازرگانی و ژیان بێبەش بكرێت و ئەوانی دیكە لە ڕێگەی دوورەوە سوودی لێ وەرگرن!
بەرپرسە سەربازییەكەی ئێران هەروەها جەختی كردەوە لەوەی گەرووی هورمز گەرووی شەرەفە و ڕێگە نادرێت دوژمنانی وڵات لەم ڕێڕەوە گەورەیە سوودمەند بن، كاتێك ئێرانییەكان لێی بێبەشن.
سەركردەی سوپای ئێران ڕووی دەمی كردە وڵاتانی دراوسێ و وتی: هاوكاریی ئەمریكا ئاسایش ناهێنێت، بەڵكو سەقامگیری و ئارامی بە دەستی دەوڵەتانی ناوچەكەیە، ئەوەش لە ڕێگەی نەهێشتن و دەركردنی هێزەكانی ئەمریكا و قەوارەی زایۆنی لە ڕۆژهەڵاتی ناوەڕاستدا فەراهەم دەبێت، ئەو ڕۆژەش زۆر دوور نییە.
لە تۆڕە کۆمەڵایەتیەکان شەیری بکە