بۆ لادانی ناتانیاهو، پێنج پارتی ئۆپۆزیسیۆنی ئیسرائیل هاوپەیمانێتییان پێكهێنا

پەیام

سەركردەی پێنج پارتی ئۆپۆزسیۆنی قەوارەی ئیسرائیل لەسەر یەكخستنی هەوڵەكانیان بۆ لەكارخستنی حكوومەتەكەی بنیامین نەتنیاهو لە هەڵبژاردنە پەرلەمانییەكەی مانگی داهاتوودا و پێكهێنانی كابینەیەكی نوێ ڕێك كەوتن. 

بەپێی كەناڵی 12ی عیبری، سەركردەی پارتە ئۆپۆزسیۆنەكان لەژێر ناوی "كوتلەی گۆڕان" لە ماڵی یائیر لاپید سەرۆكی ئۆپۆزسیۆن لە تەلئەبیب كۆ بوونەوە و ڕێككەوتننێكی هاوبەشی هەماهەنگییان واژوو كرد و بەڵێنیان دا هێرشی میدیایی دژی یەكتر ڕابگرن و دەستبەجێ دوای هەڵبژاردنەكان بە هاوبەشی كار بۆ مسۆگەركردنی زۆرینەی پەرلەمانی و پێكهێنانی حكوومەتی نوێ بكەن. 

بەپێی ڕێككەوتنەكە، لە ماوەی 48 كاتژمێری دوای كۆبوونەوەكە سێ تیمی هاوبەش بۆ: دانانی بەرنامەی 100 ڕۆژی یەكەمی حكوومەت، سنوورداركردنی ماوەی سەرۆكایەتیی ئەنجوومەنی وەزیران، داڕشتنی دەستوور و پێكهێنانی لێژنەیەكی فەرمیی لێكۆڵینەوە لە ڕووداوەكانی 7ی تشرینی یەكەمی 2023، پێكدەهێنرێن.  

ئەم هەوڵە لە كاتێكدایە بڕیارە هەڵبژاردنی پەڕلەمانی قەوارەی ئیسرائیل لە 27ی مانگی داهاتوودا بەڕێوە بچێت، لە كاتێكدا دوایین ڕاپرسییەكان پاشەكشەی پێگەی جەماوەریی هاوپەیمانیەتییەكەی بنیامین نەتانیاهو لە بەرانبەر بەرەی ئۆپۆزیسیۆندا دەردەخەن.