ئێران: لە بەرانبەر هەڕەشەكانی ئەمریكا پاشەكشە ناكەین

پەیام
 
بەرپرسێكی باڵای ئێران ڕوو بە ئەمریكا دەڵێت: "لە بەرانبەر هەڕەشەكانی ئەمریكا پاشەكشە ناكەین و سەردەمی هەڕەشە كۆتایی هاتووە".

فەریق محەممەد ڕەزا نەقدی، ڕاوێژكاری فەرماندەی گشتیی سوپای پاسداران دووپاتی كردەوە كە خەڵكی ئێران لە بەرانبەر هەڕەشەكان پاشەكشە ناكات.

لە میانی وتەیەكیدا، لە كاتی ڕێڕۆیشتنی جەماوەریی و سەربازیی دوێنێ لە تارانی پایتەخت لەژێر ناوی "گیانفیدایان"، فەریق محەممەد ڕەزا نەقدی ڕایگەیاند: بەردەوامی پشتیوانی ئەمریكا و هاوپەیمانەكانی لە "تاوانەكانی قەوارەی زایۆنیستی" بە وەڵامێكی یەكلاكەرەوەی بەرەی خۆڕاگری بەرەوڕوو دەبێتەوە.

نەقدی ڕایشیگەیاند: ئەمریكا دەیان ساڵە هەڕەشە لە ئێران دەكات، بەتایبەت كە بەردەوام دروشمی "هەموو بژاردەكان لەسەر مێزن" دەڵێتەوە، بەڵام كاتێك هاتە نێو ڕووبەڕووبوونەوەكە "ڕوون بووەوە كە هیچی پێ نییە". 

ئەو وتیشی: هێزە چەكدارەكانی ئێران توانیان لە بەرانبەر هێزێكی سەربازییدا بوەستنەوە كە واشنتۆن ملیارەها دۆلاری بۆ خەرج دەكات. 

بەپێی قسەی ڕاوێژكاری فەرماندەی گشتیی سوپای پاسدارانی گەلی ئێران لە بەرانبەر هەڕەشە و گوشارەكان پاشەكشە ناكات و هەر دەستدرێژییەكی دوژمن وەڵام دەدرێتەوە و ڕایشیگەیاند: ئەم بەرپەرچدانەوەیە تەنیا قسەكردن نابێت.