ترەمپ: ئێران بڕیارێكی دروست نەدات، زۆر نامێنێتەوە

پەیام

سەرۆكی ئەمریكا هۆشداری توند بە ئێران دەدات و جەخت دەكاتەوە كە دەبێت بۆ مانەوەیان بڕیارێكی حەكیمانە بدەن.

لە لێدوانێكیدا بۆ ڕۆژنامەنووسان، دۆناڵد ترەمپ، سەرۆكی ئەمریكا هۆشداریی دایە ئێران و ڕایگەیاند: ئەگەر ئەو وڵاتە بڕیارێكی دروست و حەكیمانە نەدات، ئەوا "زۆر نامێنێتەوە". 

ترەمپ ئاماژەی بەوە كرد كە هێزی دەریایی ئەمریكا، گەمارۆی سەر گەرووی هورمزی داوە و هیچ كەشتییەكی ئێرانی نەیتوانیوە تێپەڕێت.

جەختیشی كردەوە كە توانای پیشەسازیی سەربازیی ئێران داڕماوە، خاوەنی ڕاداری پێشكەوتوو نین و زۆربەی سەركردەكانیشیان نەماون، هەندێك جار هەوڵی چاندنی مینی دەریایی دەدەن، بەڵام بەر لەوەی جێبەجێی بكەن ناچار بە كشانەوەیان دەكەن.

ناوبراو ئاماژەی بەوەیش دا كە ئێران "ئامادەی خۆبەدەستەوەدانە" و پێشبینی دەكات جەنگی دژی ئەو وڵاتە بەم زووانە بە هەر شێوازێك كۆتایی بێت.

ئەمەو سەرۆكی ئەمریكا لە لێدوانێكی دیكەیشدا دووپاتی كردبووەوە كە تاران هەرگیز نابێتە خاوەنی چەكی ئەتۆمی و لە ئێستادا ئارەزووی گەیشتن بە ڕێككەوتنی هەیە، پێشبیینیشی كرد كە جەنگەكە پێش، یان دوای هەڵبژاردنی نیوەیی كۆنگرێس، یەكلا ببێتەوە.