فەلەستین داوای سزادانی هەندێک گرووپی چەکدار دەکات

فەڵەستین داوای لە کۆمەڵگای نێودەڵەتی کرد کە گرووپە چەکدارەکانی ناو یەکەجوولەکە نشینەکان وەک ڕێکخراوی تیرۆریستی بناسێنێت. 
 وەزارەتی دەرەوەی فەڵەستین داوای لە کۆمەڵگای نێودەوڵەتی و نەتەوە یەکگرتووەکان کرد کە گرووپە چەکدارەکانی ناو یەکە جوولەکەنشینەکان کە هێرش دەکەنە سەر فەڵەستینییەکان لە کەناری ڕۆژاوا، وەک ڕێکخراوی تیرۆریستی بناسێت و سزایان بدات. 
وەزارەتەکە لە ڕاگەیاندراوێکدا، ئاگرتێبەردانی مزگەوتێک، موڵک و ماڵی فەڵەستینییەکان و دارەکانی زەیتوون لە شارەکانی، باکووری ڕۆژهەڵاتی قودسی داگیرکراو لە لایەن ئیسرائیلییەکانی ئیدانە کرد. 
لە ڕاگەیاندراوەکەدا داوا لە کۆمەڵگای نێودەوڵەتی و نەتەوە یەکگرتووەکان کراوە کە گرووپە چەکدارەکانی ناو یەکە جوولەکەنشینەکان کە لە کەناری ڕۆژئاوا هێرشێکی ڕێکخراو و پلاندارێژراو دەکەنە سەر فەڵەستینییە سڤیلەکان، وەک ڕێکخراوی تیرۆریستی بناسێت و دژی ئەو کەسانە سزا بگرێتە بەر. 
وەزارەتی دەرەوەی فەڵەستین ڕاشیگەیاندووە کە هێرشبەرانی مزگەوتی سوڵتان ئیبراهیم دروشمی هەڕەشەئامێزیان لەسەر دیوارەکان نووسیوە و جەختی لەوە کردووەتەوە کە بەهاکانی پیرۆزی ئیسلام و بوونی فەڵەستینییەکان لە ناوچەکە کراوەتە ئامانج. 
لەو ڕاگەیاندراوەدا وەزارەتی دەرەوە فەڵەستین داوای لە کۆمەڵگای نێودەوڵەتی و ڕێکخراوەکانی پەیوەندیدار کردووە کە بەرپرسیارێتی خۆیان بە جێ بگەیەنن و هەنگاوی کرداری و پێویست بنێن بۆ پاراستنی فەڵەستینییەکان و شوێنە پیرۆزەکانیان.