ترەمپ: پلانی هێرشەكانمان بۆ سەر ئێران ڕاگرتووە و دانوستانەكانیش بەردەوامن

پەیام

دۆناڵد ترەمپ سەرۆكی ویلایەتە یەكگرتووەكانی ئەمریكا ڕایگەیاند كۆماری ئیسلامیی ئێران داوای ڕاگرتنی هێرشە سەربازییەكانی ئەمریكای كردووە و واشنتنیش بە كردەیی هێرشەكانی ڕاگرتووە. 

ترەمپ لە لێدوانێكی ڕۆژنامەوانییدا بۆ تۆڕی "نیوزماكس" جەختی لەوە كردەوە كە دانوستانە دیپلۆماسییەكانی نێوان هەردوو وڵات بەردەوامن و واشنتن لە ئێستادا هیچ پلانێكی بۆ بەكارهێنانی چەكی ئەتۆمیی یان ناردنی هێزی زەمینیی بۆ ناو خاكی ئێران نییە. 

هاوكات لەبارەی بەكارهێنانی مووشەكی ناسراو بە "دایكی بۆمبەكان" لەدژی ئێران، سەرۆكی ئەمریكا وتی ئەو مووشەكە بە واتای چەكی ئەتۆمیی نایەت. 

لە بەرانبەردا، ئەمیر حاتەمی فەرماندەی سوپای ئێران هۆشدارییەكی توندی دایە ئەمریكا و ڕایگەیاند، كە هەر هێرشێك بۆ سەر ژێرخانە ئابوورییەكانی وڵاتەكەی، بە زیانی دووقات و بە ئامانجگرتنی بەرژەوەندییەكانی لایەنی بەرانبەر وەڵام دەدرێتەوە. 

هاوكات محەمەد ئەكرەمی نیا وتەبێژی سوپای ئێرانیش ئاماژەی بەوە كرد، كە گەرووی هورمز لەژێر كۆنتڕۆڵی تەواوی هێزەكانیاندایە و پلانێكی تایبەتیان بۆ دوورخستنەوەی كەشتییە جەنگییەكانی ئەمریكا لە كەناراوەكانی وڵاتەكەیان هەیە.