وتەبێژی نوێی كۆشكی سپی پاش هەفتەیەك لە پۆستەكەی دوورخرایەوە

پەیام

وتەبێژی نوێی كۆشكی سپی دوای كەمتر لە هەفتەیەك لە دەستبەكاربوونی لە پۆستەكەی دوورخرایەوە.

ڕۆژنامەی «نیویۆرك تایمز» لە زاری سێ سەرچاوەی ئاگادارەوە بڵاوی كردەوە، كاتی زەكەریا، وتەبێژی نوێی كۆشكی سپی لە ئیدارەی دۆناڵد ترەمپ، ڕۆژی هەینی و تەنها دوای كەمتر لە هەفتەیەك لە دیاریكردنی، لە پۆستەكەی دوورخرایەوە. 

بەپێی ئاژانسی «ڕۆیتەرز»، پێشتر ترەمپ گومانی لە لێهاتوویی ناوبراو بۆ ئەو ئەركە هەبووە و ئاماژەی بەوە كردبوو كە قسەی لەگەڵدا دەكات و دەبێت پێداچوونەوە بە وەرگرتنی ئەو بەرپرسیارێتییەدا بكرێت.

دوورخستنەوەی زەكەریا دوای ئەوە دێت كە یەكەمین كۆنگرەی ڕۆژنامەوانیی شەپۆلێكی فراوانی گاڵتەجاڕی و ناڕەزایەتی بەدوای خۆیدا هێنا، ئەمەش بەهۆی شڵەژانی زۆر، هێواش خوێندنەوەی نووسراوەكان و دەربڕینێكی هەڵە كە تێیدا هاوسەرەكەی خۆی بە «سەرۆكم» وەسف كرد پێش ئەوەی ڕاستی بكاتەوە، وەك ڕۆژنامەی «گاردیان» ئاماژەی پێداوە.

هاوكات ڕەخنەكان تەنها پەیوەست نەبوون بە لاوازیی ئاستی میدیایی، بەڵكوو لێكۆڵینەوە لە بڕوانامە و كارنامەی پیشەیی ئەنجام درا؛ پاش ئەوەی پێداچوونەوە بە تۆمارە فەرمییەكانی ویلایەتەكاندا دەریخست كە هیچ مۆڵەتێكی كاركردن وەك پارێزەر بە ناوی ناوبراوەوە تۆمار نەكراوە، سەرەڕای ئەوەی پێشتر بەردەوام خۆی وەك پارێزەر بە خەڵك ناساندبوو.