نەتەوە یەکگرتووەکان: قەیرانی برسێتی ڕووی له‌ كه‌ناری رۆژاوا كردووه‌

نەتەوە یەکگرتووەکان ڕایگەیاند، لەبەردەوامی پێشێلکارییەکانی تایبەت بە مافەکانی مرۆڤ و دۆخی تەناهی لە کەناری ڕۆژئاوا، قەیرانی برسێتیش ڕووی لە ناوچەکە کردووە. 
بەڕێوەبەری جێبەجێکاری پڕۆگرامی خۆراکی جیهانی (WFP) کارۆڵ سکاو لە میانی کۆنگرەیەکی ڕۆژنامەوانیدا باسی لە پرسەکانی ڕۆژهەڵاتی ناوەڕاست کرد. 
سکاو باسی لە سەردانەکەی بۆ فەڵەستین کرد و ڕایگەیاند دۆخی باخە زەیتوونە سووتاوەکان و دارستانە چۆلکراوەکانی لە کەناری ڕۆژئاوا بینیوە. 
کارۆڵ سکاو ئاماژەی بە بەرزبوونەوەی مەترسی برسێتی لە ناوچەکە کرد و ڕایگەیاند، ئەم دۆخە لە سێ ساڵی رابردوودا دوو هێندە بووە و لە ئێستادا نزیکەی یەک ملیۆن فەڵەستینی پێویستیان بە یارمەتی خۆراک هەیە. 
بەڕێوەبەری جێبەجێکاری پڕۆگرامی خۆراکی جیهانی باسی لەوەش کرد کە کەمبوونی سەرچاوەکانی خۆراک و توانای ڕێکخراوەکانی یارمەتیدەر، بووەتە هۆی ئەوەی کە پشتیوانی پێویست ئەنجام نەدرێت. بە وتەی ئەو بەرپرسەی نەتەوە یەکگرتووەکان، ژمارەی ئەو فەڵەستینیانەی کە لەم ماوەی ڕابردوودا یارمەتییان پێ گەیشتووە، لە ٤٠٠ هەزار کەسەوە بۆ ٢٠٠ هەزار کەس دابەزیوە. 
کارۆڵ سکاو هۆشداریدا لەبارەی لێکەوتەکانی تەشەنەکردنی برسێتی لە ناوچەکە و داوای لە کۆمەڵگای جیهانی کرد کە هەوڵی خۆیان بدەن بۆ چارسەری ئەو قەیرانە و دەستبەجێ دابینکردنی سەرچاوە داراییەکان بۆ بەردەوامی یارمەتییە مرۆییەکان بۆ کەناری ڕۆژئاوا.