بەهۆی سزاكانی ئەمریكاوە، بانكی ناوەندیی مامەڵەی لەگەڵ بانكی گەشەپێدان قەدەغەكرد

پەیام 

بانكی ناوەندیی عێراق بڕیاری دا بە قەدەغەكردنی هەر جۆرە مامەڵەیەكی بانكیی گەشەپێدانی نێودەوڵەتی بە دۆلاری ‏ئەمریكیی دوای ئەوەی بانكەكە خرایە لیستی سزاكانی ئەمریكاوە. 

ئەم بڕیارەی بانكی ناوەندیی لە چوارچێوەی ‏نووسراوێكی فەرمیی و گشتاندنێكدا بۆ سەرجەم دامەزراوە داراییە نابانكییەكان دەرچووە كە تێیدا جەخت لە ڕاگرتنی ‏سەرجەم چالاكییە دۆلارییەكانی ئەو بانكە كراوەتەوە. 

هەنگاوەكەی بانكی ناوەندیی عێراق دوای ئەوە دێت كە وەزارەتی گەنجینەی ‏ئەمریكا لە هەفتەی ڕابردوودا ناوی بانكی گەشەپێدانی نێودەوڵەتیی عێراقیی خستە نێو لیستی گەمارۆ ئابوورییەكانەوە و مافی ‏مامەڵەكردنی بە دراوی دۆلاری لێ سەندەوە، ئەویش بە تاوانی دەستەبەركردنی دۆلاری ئەمریكی بۆ كۆماری ئیسلامیی ئێران. 

ئەم ڕێكارە نوێیانە دەبنە هۆی درووستكردنی بەربەستی قورس بۆ بەردەم ‏چالاكییە داراییە نێودەوڵەتییەكانی ئەو بانكە و سنوورداركردنی دەسەڵاتەكانی لە بازاڕی ئاڵوگۆڕی دراوی بیانییدا. ‏

بەرپرسانی ئەمریكا ئەوەشیان ڕاگەیاندبوو كە بانكی گەشەپێدانی نێودەوڵەتیی عێراقی درێژەپێدەری بانكی میللیی ئێرانییە كە پێشتر سزا دراوە و سەرمایەكەی لەنێوخۆی عێراق بەگەڕخستووە، بەڵام بانكەكە لە ڕوونكردنەوەیەكدا ئەو تۆمەتانەی ڕەتكردەوە.