سوپای یەمەن كوشتنی 427 چەكداری حووسی لە چەند كاتژمێرێكدا ڕاگەیاند

پەیام   
سوپای یەمەن كوشتنی سەدان چەكداری حووسی لە چەند كاتژمێری ڕابردوودا ڕاگەیاند.
بەپێی ڕاگەیەنراوێك، سوپای یەمەن ئاشكرای كرد كە لە چوارچێوەی ئۆپڕاسیۆنی «بەرەبەیانی یەمەن» و لە چەند كاتژمێری ڕابردوودا، هەزار و 119 هێرشیان لە ڕێگەی فڕۆكەی جەنگی، درۆن، تۆپخانە و مووشەكهاوێژەوە بۆ سەر حووسییەكان ئەنجام داوە.

بەپێی ڕاگەیەنراوەكە "لەو هێرشانەدا 427 چەكداری گرووپەكە كوژراون و 142 ئۆتۆمبێل و كەرەستەی سەربازی تێك شكێنراون".
سوپای حكوومەتی دانپێدانراوی یەمەن ڕایشیگەیاند: هێزەكانی حكوومەت لەو ماوەیەدا توانیویانە پێشڕەوی بكەن و لە بەرەكانی پارێزگای جەوف كە ناوچەیەكی گرنگی هاوسنوورە لەگەڵ سعوودیە و پارێزگا نەوتییەكان، دەست بەسەر چەندین پێگە و بەرزایی ستراتیژیدا بگرن.

ڕایشیگەیاند: لە پارێزگای تەعزیش بە پشتیوانیی هێزە ناوچەییەكان، ڕووبەڕووبوونەوەكان دژ بە چەكدارانی حووسی لە بەرەكاندا بەردەوامن.
ئۆپڕاسیۆنی «بەرەبەیانی یەمەن» لە پێنجی ئەم مانگەوە بە سەرۆكایەتی  رەشاد عەلیمی، سەرۆكی ئەنجوومەنی سەركردایەتی و بە ئامانجی كۆنتڕۆڵكردنەوەی دامەزراوەكانی دەوڵەت و سەنعای پایتەخت لە گرووپی حووسییەكان ڕاگەیەنراوە، بەڵام خودی گرژییەكانی یەمەن لە مانگی حەوتەوە لە نێوان سوپای یەمەن و حووسییەكاندا پەرەیانسەندووەتەوە.