ڕاپۆرت؛ له ئه‌مریكا هه‌ڵبژاردنه‌ و ڕاپرسییه‌كان ئاماژه‌ به‌ سه‌ركه‌وتنی دیموكراته‌كان ده‌ده‌ن

په‌یام

سبەینێ هاووڵاتییانی ئەمریکا بۆ بەشداریکردن لە هەڵبژاردنی نیوەیی کۆنگرێس؛ بەشداری لە دەنگداندا دەکەن، ڕاپرسییەکان پێشکەوتنی بەرچاوی دیموکراتەکان نیشان دەدەن و کۆمارییەکانیش بە سەرۆکایەتیی دۆناڵد تره‌مپ هەوڵەکانیان بۆ دوورکەوتنەوە لە شکست چڕ کردووەتەوە. 

تاکو ئێستا و لە دەنگدانی پێشوەختدا نزیکەی ٥٣ ملیۆن هاووڵاتی ئەمریکی دەنگیان داوە، لەم هەڵبژاردنەدا، دەنگدان بۆ سەرجەم ٤٣٥ کورسییەکەی ئەنجومەنی نوێنەران دەکرێت و ماوەی ئەندامێتی لەو ئەنجومەنەدا تەنیا دوو ساڵە. لەبەرانبەردا، ئەندامانی ئەنجومەنی پیران بۆ ماوەی شەش ساڵ هەڵدەبژێردرێن و پۆستەکانیان بە شێوەیەکی خولی نوێ دەکرێنەوە، بە جۆرێک دوو ساڵ جارێک نزیکەی سێیەکی ئەندامانی ئەنجومەنەکە دەچنە پێشبڕکێی هەڵبژاردنەوە. 

لەگەڵ هەڵبژاردنی کۆنگرێسدا کێبڕکێ لەسەر ٣٥ کورسیی ئەنجومەنی پیران دەکرێت، کە ٣٣ کورسییان لە چوارچێوەی خولی ئاساییدان و دوو کورسییەکەی دیکەش لە هەڵبژاردنی تایبەتدا یەکلا دەکرێنەوە؛ ئەم هەڵبژاردنە تایبەتانەش بۆ پڕکردنەوەی ئەو کورسییانەیە کە پێش تەواوبوونی وادەکەیان بەهۆی دەستلەکارکێشانەوە یان گیانلەدەستدان بە بەتاڵی ماونەتەوە، تاوەکوو کەسی سەرکەوتوو ماوەی یاساییی ماوەی کورسییەکە تەواو بکات. 

ڕاپرسییەکان دەریدەخەن دیموکراتەکان زۆرینەی ئەنجومەنی نوێنەران مسۆگەر دەکەن و بە پێچەوانەی پێشبینییەکان چانسی بردنەوەی ئەنجومەنی پیرانیشیان هەیە، کۆنترۆڵکردنی ئەنجومەنی نوێنەرانیش لەلایەن دیموکراتەکانەوە دەبێتە یەکەم کۆتوبەندی ڕاستەقینە لەسەر تره‌مپ و دەسەڵاتی پەسەندکردنی بودجەیان پێدەدات، لەگەڵ سەرۆکایەتیکردنی لیژنەکانی لێکۆڵینەوە لە گەندەڵی، پەیوەندییەکانی لەگەڵ جێفری ئیپستینی تاوانباری سێکسی و پرسە هەستیارەکان. 

لەبەرانبەردا، چارەنووسی ئەنجومەنی پیران کە کۆمارییەکان زۆرینەیەکی کەمیان تێیدا هەیە، گرنگترین پرسە. هەرچەندە کێبڕکێ لەسەر تەنیا یەک لەسەر سێی سەد کورسییەکە دەکرێت، بەڵام پێشبڕکێی چاوەڕواننەکراوی دیموکراتەکان لە ویلایەتە کۆمارییەکانی وەک تێکساس و کانساس، دەرفەتی بردنەوەی ئەنجومەنەکەی پێداون، ئەوەش دەسەڵاتی ڕێگریکردن لە دامەزراندنە دادوەرییەکانی تره‌مپ لە دادگای باڵایان پێدەبەخشێت. 

لە کێبڕکێی ئەم هەڵبژاردنەدا نزیکەی ١١ ملیار دۆلار بۆ بانگەشە خەرج کراوە کە زۆربەی لەلایەن دەوڵەمەندەکانەوە بووە، لەوانە ئیلۆن ماسک کە نزیکەی نیو ملیار دۆلاری داوەتە کۆمارییەکان. هاوکات هەڵمەتەکان گرژی و هێرشی توندی بەخۆوە بینیوە، لەوانە تۆمەتبارکردنی عەبدولسەیید، کاندیدی دیموکرات بۆ ئەنجومەنی پیران لە میشیگن بەوەی «جیهادی»یە لەلایەن تره‌مپەوە. سەرەڕای ئەمانە، ترسی گەورە ئەوەیە کە کۆمارییەکان لە ئەگەری شکستدا ئەنجامەکان ڕەت بکەنەوە، کە ئەمەش قەیرانێکی دەستووریی هاوشێوەی ڕووداوەکانی دوای هەڵبژاردنی ٢٠٢٠ی لێ دەکەوێتەوە.