وەزارەتی نەوتی عێراق هەوڵی زیادكردنی بەرهەمهێنان دەدات

پەیام    

وەزارەتی نەوتی عێراق پابەندبوونی بە ئاستی دیارییكراوی بەرهەمهێنان و جەخت لە هەوڵەكانی بۆ زیادكردنی لە ساڵی داهاتوودا دووپات دەكاتەوە.
لە ڕوونكردنەوەیەكدا، وەزارەتی نەوتی عێراق ئاشكرای دەكات كە وڵاتەكەی جەخت لە پابەندبوونی بە ئاستی دیارییكراوی بەرهەمهێنان كە لەلایەن ئۆپێك پڵەسەوە بۆی دیاری كراوە كە چوار میلۆن و 431 هەزار بەرمیلە، دەكاتەوە.

وەزارەتی نەوتی عێراق ڕایشیگەیاندووە: لە ئێستادا لەلایەن كۆمپانیایەكی ڕاوێژكاریی جیهانیی ڕاسپێردراو لەلایەن ڕێكخراوی ئۆپێك پڵەس تایبەت بە هەڵسەنگاندنی توانای بەرهەمهێنانی سەرجەم وڵاتانی ئەندامی ڕێكخراوەكە هەڵسەنگاندن بۆ ئەوپەڕی توانای بەرهەمهێنانی بەردەوام دەكرێت.
بەپێی ڕاگەیەنراوەكە، وەزارەتی نەوتی عێراق خوازیارە ئەنجامی ئەو هەڵسەنگاندنە ببێتە هۆی پێداچوونەوە بە ئاستی دیارییكراوی بەرهەمهێنان كە ڕەنگدانەوەی توانای ڕاستەقینەی عێراق بێت و ڕەچاوی تایبەتمەندی ئابووری و دۆخی هەڵاوێری چەند ساڵی ڕابردووی وڵات بكات.
وەزارەتی نەوتی عێراق جەخت دەكاتەوە كە هەر زیادكردنێك لە ئاستی بەرهەمهێنانی نەوت بە سازانی وڵاتانی ئەندامی ئۆپێك پڵەس، هەروەها دۆخی خواست و خستنەڕوو لە بازاڕی جیهانییەوە پەیوەستە.
ئەمەو هەر ئەمڕۆ، باسم خزێر وەزیری نەوتی عێراق ئاشكرای كرد كە وڵاتەكەی هەوڵ بۆ زیادكردنی بەرهەمهێنانی نەوت دەدات و بۆ ئەو مەبەستەش لەگەڵ ئۆپێكدا لە گفتوگۆدان.