ڕووسیا پلانی دابینكردنی 90 سەكۆی هەڵدانی مووشەكی پێشكەوتووی بۆ ئێران داناوە

پەیام  

بەڵگەنامە دزەپێكراوەكان ئاشكرای دەكەن ڕووسیا پلانی دابینكردنی 90 سەكۆی هەڵدانی مووشەكی پێشكەوتووی بۆ ئێران داناوە.
ڕۆژنامەی «گاردیان»ی بەریتانی لە زاری بەڵگەنامە دزەپێكراوەكانی كەرتی پیشەسازیی بەرگریی ڕووسیاوە ئاشكرای كرد، مۆسكۆ ڕێك كەوتووە بۆ دابینكردنی 90 سەكۆی هەڵدانی مووشەكی ئاراستەكراو بۆ هێلیكۆپتەرەكانی ئێران.

بەڵگەنامەكان كە لەلایەن دەزگای تایبەتی «دالاس ئەنالیتیكس»ی ئۆكراینییەوە بەدەستهاتوون، وردەكاریی دابینكردنی سەكۆكانی مووشەكی (ئێڵ ئێم یو ئاڕ) ئاشكرا دەكەن، كە سوپای ڕووسیا لە جەنگی ساڵی 2022ـەوە بە بەرفراوانی دژی ئۆكراینا بەكاری هێناون.
بەپێی خشتەی كۆمپانیای «ڤیمپێل»ی ڕووسی كە تایبەتمەندە لە دروستكردنی مووشەك و سیستەمەكانی هاوێشتندا، لە ئایاری 2024 گرێبەستێكی هەناردەكردن بە كۆدی «K-10» تۆمار كراوە، بەجۆرێك كاتی ڕادەستكردنی سەكۆكان لە نێوان كۆتایی 2024 بۆ كانوونی یەكەمی 2025 دیاری كراوە، هەروەها بەڵگەنامە نێوخۆییەكانیش ئێران وەك وڵاتی مەبەست دەناسێنن.

هەرچەندە ڕوون نییە سەكۆكان گەیشتبێتنە ئێران، بەڵام تۆماركردنی شەش فڕۆكەی مەشقیی «یاك-130» بۆ تاران لە ساڵی 2023، لەگەڵ ڕاپۆرتەكانی پێشوودا یەك دەگرێتەوە و بەڵگەی بەهێزە لەسەر گەشەكردنی هاوكارییە سەربازییە نهێنییەكانی نێوان ئەم دوو وڵاتەدا.