لە بەریتانیا (محەمەد) یەكەم ناوە بۆ منداڵان و ناوى (یەحیا)ش هەڵكشاوە

پەیام 

ئەمساڵیش لە بەریتانیا ناوی محەمەد یەكەم ناوە و بۆ یەكەمجاریش (یەحیا) چووەتە ڕیزبەندی دیارترین ناوی منداڵانی تازەلەدایكبوو.

نووسینگەی ئاماری نیشتیمانی لە بەریتانیا ڕاپۆرتێكی بڵاو كردووەتەوە و تیایدا ئاماری ناونانی منداڵانی لە شانشینە یەكگرتووەكان بڵاو كردووەتەوە.

بەپێی لیستەكە، ناوی محەمەد بۆ ساڵی دووەم لەسەر یەك لە ڕیزی پێشەوەی ناوەكاندایە و پێنج هەزار و 721 منداڵی كوڕ بە ناوی محەمەدەوە ناونراون.

هەروەها ناوی (نووح) لە ڕیزبەندیی دووەمدایە، ئۆلیڤەریش سێیەم ناوە كە زۆرترین كەس  بۆ ناوی كوڕەكانیان هەڵیان بژاردووە.

هەروەها ئۆلیڤیا و ئەمیلیا و لەیلا لە ڕیزی یەكەم تا سێیەم ناوی بەربڵاون بۆ كچانی تازەلەدایكبوو.

لای خۆیەوە ڕۆژنامەیەكی هەفتانەی جوولەكەكانی بەریتانیا ئاماژەی بەوە داوە ناوی یەحیا كە دەگەڕێتەوە بۆ یەحیا سنوار، سەرۆكی پێشووی بزووتنەوەی حەماس، هاتووەتە ڕیزی 100 ناوی یەكەمی زۆر بەربڵاو بۆ منداڵانی تازە لەدایكبوو لە ئینگلتەرا و وێڵز.

ڕۆژنامەكە نووسیویەتی: ناوی یەحیا لە ڕیزبەندیەكەدا 33 ناو هاتووەتە پێشەوە، بەراورد بە ساڵی ڕابردوو و بووەتە 93ـهەمین ناوی بەربڵاو لەو وڵاتە، لە ساڵی 2024 ـدا 583 منداڵی كوڕ ناوی یەحیایان لێ نراوە.