ئەو كەشتییە تایلەندییەی لە هورمز بە ئامانج گیرا بووەتە جێی یاریی منداڵان

پەیام

دیمەنی ئەو كەشتییە تایلەندییە بڵاو كرایەوە كە دوای بە ئامانجگرتنی لە گەرووی هورمز ئێستا لە دوورگەیەكی ئێران بێ كەڵك لەنگەری گرتووە و بووەتە جێی یاریی منداڵان.

كەشتی بارهەڵگری مایۆری ناری كە بە ئاڵای تایلەندەوە لە میانی جەنگی نێوانی ئێران و ئیسرائیل-ئەمریكا لە نزیك گەرووی هورمز بە مووشەك هێرشی كرایە سەر، لە نزیك دوورگەی قشم ماوەتەوە.

كەشتییەكە ڕۆژی 11ی مانگی سێی ئەمساڵ و دوای كەمتر لە دوو هەفتە لە هێرشی ئەمریكا و قەوارەی زایۆنی بۆ سەر ئێران لە كاتی بەڕێكەوتنی لە ئیماراتەوە بەرەو هیند لە 50 مایلی نزیك كەناراوەكانی دوبەی بە ئامانج گیرا و دوای پێكانی بەرەو قشم ڕاكێش كرا. كەشتییە بارهەڵگرەكە ئێستا بە تەواوی بێ كەڵك بووە.

لاشەی كەشتییەكە لە نزیك 30 مەتری كەنارئاوەكانی قشمە و بە وتەی بەرپرسانی ئێران، تا ئێستا هەوڵ نەدراوە كۆ بكرێتەوە، یان بگوازرێتەوە.

 بوونی كەشتییەكە وەك مەترسییەك دەبینرێت و تەنانەت منداڵانیش وەك شوێنی یاریكردنی بەكاری دەهێنن.

هەر دوابەدوای هێرشی هێزی دەریایی ئێران بۆ سەر كەشتییەكە كۆمپانیای باری دەریایی تایلەند ڕایگەیاند كە لە ڕووداوەكەدا سێ كەشتیوانیی بێسەروشوێن بوون، دواتر لەسەر زاری وەزیری دەرەوە كوژرانی سێ كەشتیوانەكە و ڕزگاركردنی 20 ئەندامی دیكەی سەر كەشتییەكە ڕاگەیەنرا.