كالیفۆرنیا جەژنەكانی موسڵمانانی وەك بۆنەی فەرمی لە ویلایەتەكەدا ناساند

پەیام

ویلایەتی كالیفۆرنیای ئەمریكا بە فەرمی جەژنەكانی ڕەمەزان و قوربانی وەك بۆنەی ئایینی لە ویلایەتەكەدا ناساند.

گافین نیوسوم، حاكمی ویلایەتی كالیفۆرنیای ئەمریكا، یاسایەكی نوێی واژوو كرد كە بەپێی ئەو یاسایە، جەژنەكانی ڕەمەزان و قوربان وەك بۆنەی فەرمی لە كالیفۆرنیا دەناسرێن و ئاهەنگی تایبەتیان بۆ ئەنجام دەدرێت.

ئەم بڕیارە ڕێگە بە قوتابخانە حكومییەكان و كۆلێژەكان دەدات بەپێی ڕێككەوتنی خۆجێیی، لەو ڕۆژانەدا دەوام ڕابگرن.

بەپێی ئەم یاسایە، فەرمانبەران دەتوانن پشووی ساڵانەی خۆیان بۆ بەشداری لەم جەژنانە بەكار بهێنن، بەڵام ئەم بڕیارە بە مانای ئەوە نییە ڕۆژەكە بۆ هەمووان بە گشتی، پشووی فەرمی و بە مووچە بێت، هەروەها ئەم جەژنانە كاریگەرییان لەسەر پشووە دادوەرییەكان نابێت و دادگاكان بە كراوەیی دەمێننەوە. 

لای خۆیەوە ئەنجوومەنی پەیوەندییە ئیسلامییەكانی ئەمریكا ئەم هەنگاوەی بەرز نرخاند و بە چارەسەرێك بۆ كێشەی قوتابیان و فەرمانبەران ناویان برد كە پێشتر لە نێوان كار و بۆنە ئاینییەكاندا تووشی سەختی دەبوون. 

پێشتر و لە ساڵی ڕابردووشدا ویلایەتی واشنتنیش هەنگاوێكی هاوشێوەی گرتبووە بەر و دوو جەژنەكەی بە فەرمی ناساندبوو.