ئێران: پەیامەكانی ئەمریكا تەنیا لەڕێگەی نێوەندگیرەكانەوە پێمان گەیشتوون

پەیام

وەزارەتی دەرەوەی ئێران بە فەرمی بوونی هەر جۆرە دانوستانێكی ڕاستەوخۆی لەگەڵ واشنتۆن ڕەت كردەوە و ڕایگەیاند، تەنیا لەڕێگەی نێوەندگیرەكانەوە پەیامەكانی ئەمریكامان پێ گەیشتوو.
 
ئیسماعیل بەقایی، وتەبێژی وەزارەتی دەرەوەی ئێران لە كۆنگرەیەكی ڕۆژنامەوانیدا ڕایگەیاند، پەیامەكانی ئەمریكا تەنیا لەڕێگەی نێوەندگیرەكانەوە گەیشتوون و هیچ جۆرە دانوستانێكی ڕأستەوخۆ لەگەڵ واشنتۆن لەئارادا نییە. ئاماژەی بەوەش دا، ئەو كۆبوونەوانەی لە پاكستان كراون، بە بڕیاری ئەو وڵاتانە خۆیان بووە و ئێران هیچ بەشدارییەكی تێدا نەكردووە. 
 
ئیسماعیل بەقایی ڕاشیگەیاند: هێرشەكانی سەر وێستگەی ئەتۆمیی بووشەهری كارێكی زۆر مەترسیدارە كە دەیسەلمێنێت ئەمریكا و قەوارەی زایۆنی هیچ هێڵێكی سوور ناناسن. جەختیشی كردەوە، كە پرسی كشانەوە لە پەیماننامەی قەدەغەكردنی چەكی ئەتۆمی لە پەرلەمان گفتوگۆی لەسەر دەكرێت، بەڵام وڵاتەكەی هەرگیز هەوڵی بەدەستهێنانی چەكی ئەتۆمیی نەداوە. 
 
وتەبێژەكەی ئێران ڕەخنەی توندی لە ئاژانسی نێودەوڵەتیی وزەی ئەتۆم گرت تا ئێستا ئەو پێشێلكارییانەی سەركۆنە نەكردووە. ڕاشیگەیاند: تاران زۆر باش دەزانێت چی دەوێت و بڕیاری جەنگ و ئاشتیش بەپێی دەستووری وڵات دەدرێت، نەك بە سەپاندنی مەرجی دەرەكی. بڕیاری كۆتاییهێنان بە جەنگیش لە  دەستی ئێراندایە.