یەكەم كاروانی سەربازیی هەسەدە لە گەڕەكە كوردنشینەكانی حەلەب كشانەوە

پەیام 

وەك جێبەجێكردنی ڕێككەوتنی نێوانیان یەكەم كاروانی سەربازیی هێزەكانی سووریای دیموكرات (هەسەدە) لە گەڕەكە كوردنشینەكانی حەلەب كشانەوە.

ئاژانسی هەواڵی سووریا (سانا) بڵاوی كردەوە: ئەمڕۆ یەكەم كاروانی سەربازیی هەسەدە لە گەڕەكەكانی شێخ مەقسود و ئەشرەفیە لە شاری حەلەب لەژێر چاودێری وەزارەتی بەرگریی سووریادا، بەرەو ناوچەكانی ڕۆژهەڵاتی فوڕات كشانەوە.

كشانەوەی هێزەكانی هەسەدە لە چوارچێوەی جێبەجێكردنی ڕێككەوتننامەی بەرایی نێوان ئیدارەی نوێی سووریا و هێزەكانی سووریای دیموكرات (هەسەدە) لە 28ی ئادار دێت.

بەپێی ڕێككەوتنەكە هەر دوو لا لەسەر گۆڕینی هێزەكانی ئاسایشی ناوخۆیی سەر بە هەسەدە لە گەڕەكەكانی شێخ مەقسود و ئەشرەفیەی حەڵەب بۆ هێزەكانی ئاسایشی گشتیی ئیدارەی نوێ ڕێك كەوتبوون.

هاوكات ڕێككەوتنەكە ئازادكردنی 170 دیلی سەر بە هەسەدە و ژمارەیەك تەرمیان لەگەڵ ئازادكردنی نزیكەی 400 دیلی سەربازانی ئیدارەی نوێ لەخۆ دەكرێت كە لەژێر چاودێریی ئەمریكادا ئەنجام دەدرێت.

ڕۆژی ڕابردووش هەر یەك لە ئیدارەی نوێی سووریا لەلایەك و ئەنجوومەنی گەڕەكەكانی شێخ مەقسود و ئەشرەفیە بە سەرپەرشتی هێزەكانی سووریای دیموكرات لەلایەكی دیكەوە یەكێك لە 14خاڵەكەی  ڕێككەوتنەكە بە مەبەستی پاككردنەوەی زیندانەكان كە ئازادكردنی 146 ئەندامی هەسەدە بوو بەرانبەر بە 97 ئەندامی ئیدارەی نوێ، جێبەجێ كرا.