پزیشكانی نیشتەجێی خولاوی هەولێر بایكۆتی سەرتاسەرییان ڕاگەیاند

پەیام

پزیشكانی نیشتەجێی خولاوی هەولێر وەزارەتی تەندروستیی حكومەتی ماوەبەسەرچوو بە بێ پلان ناو دەبەن و لە ئەمڕۆشەوە بایكۆتی چوونە دەوامیان كرد.

لە ڕاگەیەنراوێكدا، پزیشكانی نیشتەجێی خولاوی هەولێر ئاشكرایان كرد "شەش مانگە بەهۆی دانەمەزراندنی پزیشكە تازە دەرچووەكانەوە دۆخێكی چەقبەستوو دروست بووە، بەو هۆیەوە پزیشكانی ساڵی یەكەم و دووەم و سێیەم تا پزیشكانی پایەبڵند لە دەرەوەی ناونیشان و ئەركی پزیشكیان خزمەت دەكەن و لە شوێنەكانی خۆیان ماونەتەوە".

پزیشكانی نیشتەجێی خولاوی هەولێر ڕایدەگەیەنێت: وەزارەتی تەندروستی هیچ پلانێكی بۆ چارەسەركردنی كێشەكانیان نییە. هەروەها هەڕەشەی مانگرتنیان كرد و ڕایانگەیاند: لە ئەمڕۆ، شەممەوە تا جێبەجێكردنی داواكارییەكانمان بایكۆتی دەوام لە سەرجەم فریاكەوتن و نەخۆشخانەكانی هەولێر و سۆران بە هەموو بەشەكانیەوە ڕادەگەیەنین.

داواكارییەكانی پزیشكانی نیشتەجێی خولاوی هەولێر خۆی دەبینێتەوە لە دامەزراندنی پزیشكانی نوێ و كۆتاییهێنان بەو دۆخە چەقبەستووەی تیایدان، هەروەها وەستاندنی سیستەمی نوێی شیفتكردن و گۆڕینی بۆ پلەبەندی.

پزیشكان ئەوەشیان ڕوون كردوەتەوە ئەوان لەو دۆخەی دروست بووە بەرپرس نین، بەڵكو پێشتر هەموو نەخۆشخانەكان ئاگادار كراونەتەوە لە ئەگەری هەر ڕووداوێكی نەخوازراو وەزارەتی تەندروستی لێی بەرپرسە.