كەشتی مادلین كە بەرەو غەززە جووڵەی كردبوو سەرنشینەکانى ڕفێندراون

پەیام
 
میدیا زایۆنییەكان بڵاویان كردەوە، كەشتی مادلین كە لە دوورگەكانی ئیتاڵیاوە بەرەو كەرتی غەززە جووڵەی كردبوو، پاش نزیكبوونەوەی لە كەناراوەكانی كەرتی غەززە لەلایەن هێزی زایۆنییەوە دەستی بەسەرداگیراوە و سەرنشینەكانی ڕفێندراون.

بەپێی هەواڵی میدیا زایۆنیییەكان، هێزی كۆماندۆی دەریایی زایۆنی دەستی بەسەر كەشتییەكەدا گرتووە و بەرەو بەندەرەكانی قەوارەی زایۆنی بردوویەتی، هاوكات تەواوی چالاكوانەكانی سەر كەشتییەكەی رفاندووە كە یەكێكیان كوردە.

كەشتیی مادلین لە یەكی حوزەیرانەوە لە بەندەری سەقەلەییەی ئیتاڵیاوە دەستی بە جووڵە كردووە و نزیكەی تۆنێك هاوكاری پزیشكی و هاوكاری دیكەی مرۆیی هەڵگرتووە و ئامانجی بووە بگاتە بەندەرەكانی كەرتی غەززە و هاوكارییەكان بگەیەنێتە لێقەوماوان.

پێشتر وەزارەتی بەرگری قەوارەی زایۆنی رایگەیاند، ڕێنماییان بۆ سوپا و هێزی دەریایی ناردووە نەهێڵن كەشتی مادلین بگاتە كەناراوەكانی كەرتی غەززە و، هاوكات رایانگەیاند، یەكێك لە سیناریۆكان دەستگیركردنی چالاكوانانی سەر كەشتییەكە و بردنی كەشتییەكەیە بۆ بەندەرەكانی ئیسرائیل.