لەسەر هێرشەکانى ئیسرائیل، عێراق داواى هەنگاوی كرداری لە وڵاتانی جیهان دەكات

پەیام 

حكومەتی عێراق داوای كۆبوونەوەی ئەنجوومەنی ئاسایش و هەنگاوی كرداری لە وڵاتانی جیهان دەكات. دژی پێشێلكردنی ئاسمانی وڵاتەكەشی سكاڵا دژی قەوارەی زایۆنی تۆمار دەكات.

باسم عەوادی، وتەبێژی فەرمیی حكومەتی عێراق ڕایگەیاند: هێرشەكە پێشێلی ئاشكرای بنەماكانی یاسای نێودەوڵەتی و پەیماننامەی نەتەوە یەكگرتووەكانەوە و ئاسایش و ئایت نێودەوڵەتی دەخاتە مەترسییەوە، پێویستە لەسەر كۆمەڵگەی نێودەوڵەتی بێلایەن نەوەستن بەرانبەر ئەم پێشێلكارییە.

حكومەتی عێراق داوای كردووە بەپەلە ئەنجوومەنی ئاسایشی نێودەوڵەتی كۆببێتەوە و ڕێكاری یەكلاكەرەوە بۆ ڕاگرتنی ئەم دوژمنكارییە بگرێتە بەر و شكۆ بۆ یاسای نێودەوڵەتی بگێڕێتەوە. ڕاشیگەیاندووە: ئەگەر دەریش كەوت كە ئەم رێكارانە ناتوانن ڕۆڵی خۆیان بگێڕن و دەستەوسانن ئەوا وڵاتان گفتوگۆی جددی بكەن بۆ دۆزینەوەی چارەسەری جێگرەوە كە دادگەری و ئاشتی لە جیهاندا بێنێتە دی.

هاوكات وەزارەتی دەرەوەی عێراق ڕایگەیاند، لە ئەنجوومەنی ئاسایش سكاڵایان تۆمار كردووە دژی قەوارەی زایۆنی بەرانبەر پێشێلكردنی ئاسمانی عێراق.ڕاشیگەیاندووە:ئەمە پێشێلی ئاشكرای سەروەریی عێراقە و داوا دەكەین ڕێگە لە قەوارەی زایۆنی بگیرێت بۆ ئەم پێشێلكارییانە.