قائیمقامییه‌تی سلێمانی: له‌ مانگێكدا ده‌ستمان به‌سه‌ر 26 تۆن مه‌وادی به‌سه‌رچوودا گرتووه‌

لیژنه‌ هاوبه‌شه‌كانی قائیمقامییه‌تی سلێمانی ته‌نیا له‌ ماوه‌ی یه‌ك مانگدا ده‌ستیان به‌سه‌ر 26 تۆن مه‌وادی به‌سه‌رچوودا گرتووه‌ و 21 شوێنیشیان داخستووه‌.

لیژنه‌ هاوبه‌شه‌كانی قائیمقامییه‌تی سلێمانی له‌ مانگی شه‌شی ئه‌مساڵدا 21 شوێنیان داخستووه‌ و سێ حاڵه‌تی دادگا تۆماركراوه‌ و نزیكه‌ی  26 تۆن مه‌وادی ماوه‌به‌سه‌رچووشیان له‌ناوبردوه‌.

به‌پێی بڵاوكراوه‌یه‌كی قائیمقامییه‌تی سلێمانی، لیژنه‌ هاوبه‌شه‌كان له‌ ماوه‌ی یه‌ك مانگدا شه‌ش هه‌زار و 770 سه‌ردانیان بۆ بازار و شوێنه‌ گشتیه‌كانی شاری سلێمانی ئه‌نجامداوه‌، له‌و سه‌ردانانه‌شدا (127) حاڵه‌تی ئاگاداركردنه‌وه‌ و (452) حاڵه‌تی سه‌رپێچی جۆراوجۆر تۆماركراوه‌.

له‌ بڵاوكراوه‌كه‌دا هاتووه‌، كه‌ له‌م مانگه‌دا ته‌نیا (3) حاڵه‌تی دادگا تۆماركراوه‌، (21) شوێنی گشتی و بازرگانیش داخراون، ئه‌و شوێنانه‌شی كه‌ رووبه‌ڕووی داخستن بوونه‌ته‌وه‌ به‌هۆی دووباره‌ ئه‌نجامدانی سه‌رپێچی و پابه‌ندنه‌بوونیان بووه‌، به‌و رێنمایانه‌ی كه‌ پێشتر له‌ لایه‌ن لیژنه‌ هاوبه‌شه‌كانه‌وه‌ پێیاندرابوون.
هه‌روه‌ها لیژنه‌ هاوبه‌شه‌كانی قایمقامیه‌تی سلێمانی له‌ مانگی حوزه‌یراندا  (26) تۆن و (29) كیلۆگرام مه‌وادی ماوه‌به‌سه‌رچوویان به‌ به‌بڕی (61) ملیۆن دینار له‌ناوبردوه‌.