چین به‌ نیشاندانی هێزی وڵاته‌كه‌ی یادی 80 ساڵه‌ی كۆتایی هاتنی جه‌نگی جیهانیی دووه‌می كرده‌وه‌

په‌یام

سەرۆکی چین "شی جین پینگ" میوانداریی گەورەترین نمایشی سەربازیی وڵاتەکەی کرد، کە بە بەشداریی سەرۆکی ڕووسیا "ڤلادیمیر پوتین" و سەرۆکی کۆریای باکوور "کیم جۆنگ ئون" بەڕێوەچوو. هاوکات دۆناڵد ترەمپ، سەرۆکی ئەمریکا، ئەو سێ سەرۆکەی بە پیلانگێڕی دژ بە ویلایەتە یەکگرتووەکانی ئەمریکا تۆمەتبار کرد.
ئەو نمایشە بە بۆنەی تێپەڕبوونی 80 ساڵ بەسەر ڕزگاربوونی چین لە داگیرکاریی ژاپۆن لە کۆتایی جەنگی جیهانیی دووەمدا بەڕێوەچوو.
سەرکردەکانی ڕۆژاوا بە شێوەیەکی بەرفراوان خۆیان لەم بۆنە گەورەیە بەدوور گرت، لە کاتێکدا پوتین و کیم - کە هەردووکیان ڕکابەری ڕۆژاوان - میوانی فەخری بوون.
نمایشەکە بۆ پیشاندانی هێزی سەربازیی چین و کاریگەریی دیپلۆماسیی وڵاتەکە داڕێژرابوو، هەروەها ئەم نمایشە لە کاتێکدایە کە ئەو گومرگانەی دۆناڵد ترەمپ، سەرۆکی ئەمریکا، سەپاندوونی و سیاسەتە ناجێگیرەکانی، بووەتە هۆی تێکچوونی پەیوەندییەکانی واشنتن لەگەڵ هاوپەیمانان و نەیارانیشدا.
شی جین پینگ لە بەردەم زیاتر لە 50 هەزار کەس لە گۆڕەپانی تیانانمێن وتی: "ئەمڕۆ، مرۆڤایەتی ڕووبەڕووی بژاردەی ئاشتی یان جەنگ، گفتوگۆ یان ڕووبەڕووبوونەوە، بردنەوەی هەمووان یان دۆڕاندنی هەمووان بووەتەوە."، هەروەها وتی کە گەلی چین "بە پتەوی لە مێژوودا وەستاوە".