2 کاتژمێر پێش ئێستا
77 جار خوێنراوەتەوە
لوتكەی نائاسایی وڵاتانی عەرەبی ـ ئیسلامی لە قەتەڕ بەڕێوەدەچێت
پەیام
وەزارەتی دەرەوەی قەتەر ڕایگەیاند: لوتكەی نائاسایی عەرەبی ـ ئیسلامی تاوتوێی پڕۆژەبڕیارێك لەبارەی هێرشەكانی قەوارەی زایۆنی دەكات.
ماجد ئەنساری، وتەبێژی وەزارەتەكە ڕایگەیاند: ڕۆژی دووشەممە، لوتكەی نائاسایی عەرەبی ـ ئیسلامی لە دەوحەی پایتەختی قەتەڕ دەبەسترێت و تیایدا تیشك دەخاتە سەر پێشهاتە مەترسیدارەكانی ناوچەكە، هەروەها تاوتوێی پڕۆژەبڕیارێك لەبارەی هێرشی ئیسڕائیل بۆ سەر وڵاتی قەتەڕ دەكرێت.
وتەبێژی وەزارەتی دەرەوەی قەتەڕ وردەكاریی لەبارەی پڕۆژەبڕیارەكەوە نەدركاند، بەڵام ڕاشیگەیاندووە: پڕۆژەكە لە میانەی كۆبوونەوەی ئامادەكاریی وەزیرانی دەرەوەی وڵاتانی عەرەبی و ئیسلامی پێشكەش دەكرێت كە سبەی، یەكشەممە، بەڕێوەدەچێت.
وتەبێژی وەزارەتی دەرەوەی قەتەڕ ڕاشیگەیاندووە: لوتكەی عەرەبی ـ ئیسلامی لەم كاتەدا ئاماژە و مانای تایبەتی هەیە و وڵاتانی عەرەبی و ئیسلامی هاوسۆزی قەتەڕن لە ڕووبەڕووبوونەوەی ئەو تیرۆرەی لەلایەن ئیسڕائیلەوە بەرانبەری دەكرێت.
سێشەممەی ڕابردوو سوپای داگیركەری زایۆنی هێرشی ئاسمانیی كردە سەر باڵەخانەی نیشتەجێبوونی سەركردەكانی بزووتنەوەی حەماس لە دەوحە و لە ئەنجامدا چەند ئەندامێكی حەماس و ستافی سەركردەكان لەگەڵ پۆلیسێكی قەتەڕی شەهید بوون و حەماسیش ڕایگەیاند: سەركردەكانیان لە هێرشەكە ڕزگاریان بووە.
لە تۆڕە کۆمەڵایەتیەکان شەیری بکە