عێراق سیستمی بەرگریی ئاسمانی لە كۆریای باشوور دەكڕێت

پەیام 

عێراق سیستەمی بەرگریی ئاسمانی لە كۆریای باشوور وەردەگرێت و لە پلانیدایە لە ساڵی ئایندەوە كارای بكات.

وەزارەتــی بەرگریی عێراق ڕێكەوتنی كردووە بۆ وەرگرتنی سیستەمی بەرگری ئاسمانیی لە كۆریای باشوور لە سەرەتای ساڵی داهاتوودا، ئەمەش وەك بەشێك لە پلانەكانی بۆ بەهێزكردنی تواناكانی بەرگری و نوێكردنەوەی سیستەمی پاراستنی ئاسمانی. 

لەكۆبونەوەیەكی شاندی هەردوو وڵاتدا كە سەرۆكوەزیرانی عێراق ئامادەی بووە، حكومەتی عێراق خواستی خۆی  بۆ پەرەپێدانی هاوكاریی سەربازی و تەكنیكی لە بواری بەرگرییە ئاسمانییەكاندا دووپاتكردەوە، كە جێبەجێكردنی نوێترین سیستەم و تەكنەلۆژیاكان لەخۆ دەگرێت.

سوودانی لە كۆبوونەوەكەدا ئاماژەی بەوە داوە، كە حكومەت پلانێكی ستراتیژیی داڕشتووە بۆ پەرەپێدانی پڕۆگرامەكانی چەك و تواناكانی بەرگری، كە نوێكردنەوەی سیستەمی بەرگریی ئاسمانی دەگرێتەوە، بەجۆرێك كە سەقامگیری تواناكانی سەربازی و ئامادەیی بۆ ڕووبەڕووبوونەوەی ئاستەنگە هەرێمی و نێودەوڵەتییەكان مسۆگەر بكات. 

هەروەها ستایشی پشتیوانیی كۆریای باشووری بۆ عێراق لە قۆناغە جیاوازەكاندا كرد، بەتایبەتی لە كاتی شەڕی دژی تیرۆردا، جەختی لە پێویستی بوونی پەیوەندییەكی دوو قۆڵیی گشتگیر و فرەلایەنە كردەوە كە بوارەكانی بەرگری، ئاسایش، گەشەپێدان و ئابووری بگرێتەوە.