11/04/2026
324 جار خوێنراوەتەوە
چوارچێوەی هەماهەنگی ڕۆڵی پەرلەمانتاران لە هەڵبژاردنی سەرۆككۆمار بەرز دەنرخێنێت
پەیام
چوارچێوەی هەماهەنگیی شیعەكانی عێراق ڕاگەیەنراوێكی لەبارەی هەڵبژاردنی سەرۆككۆمارەوە بڵاو كردەوە و ئەركی قۆناغی داهاتووی دیاریی كرد.
لە ڕاگەیەنراوێكدا دوابەدوای بەڕێوەچوونی دانیشتنی هەڵبژاردنی سەرۆككۆمار و دەرچوونی نزار ئامێدی بۆ ئەو پۆستە، چوارچێوەی هەماهەنگیی شیعەكانی عێراق پیرۆزبایی لە ناوبراو كرد و ڕایگەیاند: هەڵبژاردنی سەرۆككۆمار هەنگاوێكی گرنگە بە ئاڕاستەی تەواوكردنی ڕێڕەوی بنیاتنانی دەوڵەت و قووڵكردنەوەی پڕۆسەی دیموكراسی و ڕێزگرتن لە ویستی گەل.
لە بەشێكی دیكەی ڕاگەیەنراوەكەدا، چوارچێوەی هەماهەنگی ئامادەبوونی ئەندامانی ئەنجوومەنی نوێنەران لە دانیشتنەكەدا و هەڵگرتنی بەرپرسیارێتی نیشتمانی بەرز نرخاندووە و ڕایشگەیاند: ئەو هەنگاوە متمانەی هاووڵاتیان بە پڕۆسەی دیموكراسی بەهێزتر دەكات.
بەپێی ئەوەی چوارچێوەی لە ڕاگەیەنراوەكەدا ئاماژەی پێ كردووە "هەنگاوی داهاتوو یەكخستنی هەوڵەكان و زاڵكردنی بەرژەوەندیی باڵای نیشتمان و كاركردن بە ڕۆحیەتی هاوبەشی ڕاستەقینەی نێوان سەرجەم هێزە سیاسییەكان دەخوازێت".
لە تۆڕە کۆمەڵایەتیەکان شەیری بکە