20 کاتژمێر پێش ئێستا
220 جار خوێنراوەتەوە
ئیسپانیا هۆشداری به كه‌شتیگه‌لی خۆڕاگری ده‌دات
په‌یام
حکوومەتی چەپی کەمینە لە ئیسپانیا، داوای لە کەشتیگەلی جیهانیی خۆڕاگری کرد نەچێتە ناوچە مەترسیدارەکان، کە لە ڕێگەی دەریاوە بەرەو غەززە بەڕێکەوتووە بۆ کردنەوەی ڕێڕەوێکی مرۆیی بۆ غەززە و شکاندنی گەمارۆی قه‌واره‌ی داگیركه‌ری زایۆنی.
بەپێی هەواڵێکی ئاژانسی هەواڵی فەڕمی ئیسپانیا EFE، کە بە پشتبەستن بە سەرچاوەکانی سەرۆکایەتی ئەنجوومەنی وەزیران بڵاویکردووەتەوە، حکوومەت بەهۆی ئەگەری دەستوەردانی سەربازانی قه‌واره‌ی داگیركه‌ری زایۆنی، ئامۆژگاری کەشتیگەلی جیهانیی خۆڕاگری دەکات نەچێتە ئەو سنوورە دەریاییەی کە ناوی ناوە "ناوچەی مەترسیدار".
سەرچاوەکانی سەرۆکایەتی ئەنجوومەنی وەزیرانی ئیسپانیا ڕایانگەیاندووە: "حکوومەت بە توندی ئامۆژگاری کەشتیگەلەکە دەکات لەم دۆخەدا نەچێتە ناوچە قەدەغەکراوەکە، چونکە ئەگەر ئەوە بکات ئەوا بەشێوەیەکی جددی ئاسایشی خۆی دەخاتە مەترسییەوە. ئامانجی کەشتیگەلەکە شایەنی ستایشە و ڕەوایەتی هەیە، بەڵام ژیانی ئەندامەکانی لەسەرووی هەموو شتێکەوەیە".
هەمان سەرچاوە ئاماژەی بەوەیش کرد کەشتییە سەربازییەکەی ئیسپانیا کە ڕەوانەی ناوچەکە کراوە لەناو مەودای ئۆپەراسیۆنیدایە بۆ ئەوەی لە کاتی پێویستدا ئۆپەراسیۆنی ڕزگارکردن ئەنجام بدات، بەڵام ناتوانێت بچێتە ناوچە قەدەغەکراوەکەی کە لەلایەن سوپای قه‌واره‌ی داگیركه‌ری زایۆنی دیاریکراوە، چونکە ئەوە مەترسی دەخاتە سەر ئاسایشی فیزیکی ئەندامانی تیمەکە و کەشتیگەلەکە".
کەشتیگەلی جیهانیی خۆڕاگری کە بەردەوامە لە ڕۆیشتن بەرەو غەززە و لە نزیکەی ٤٠ کەشتی پێکدێت، لە کۆتاییدا ڕایگەیاند ١٢٠ میلی دەریایی لە غەززەوە دوورە.
لە تۆڕە کۆمەڵایەتیەکان شەیری بکە