ئەمریکا بڕیاری سنووردارکردنی دەسەڵاتەکانی ترەمپی بۆ شەڕی ئێران پەسەند کرد

ئەنجومەنی نوێنەرانی ئەمریکا لە بڕیارێکی مێژووییدا، داوای لە دۆناڵد ترەمپ کرد کۆتایی بە جەنگی ئێران بهێنێت و دەسەڵاتەکانی سەرۆکی بۆ ئەنجامدانی هەر چالاکییەکی سەربازیی نوێ دژی تاران سنووردار کرد. 
لەم دەنگدانەدا کە کێشمەکێشێکی زۆری لە ناوەندە سیاسییەکان دروست کرد، ٢١٥ پەرلەمانتار پشتگیریی بڕیارەکەیان کرد و لە بەرانبەریشدا ٢٠٨ ئەندام دژی بوون. ئەم هەنگاوە لە کاتێکدایە کە زۆرینەی ئەنجومەنەکە لە دەستی پارتی کۆمارییە، بەڵام فشارەکان بۆ ڕاگرتنی جەنگ وایکردووە تەنانەت بەشێک لە هاوڕێکانی ترەمپیش دەنگ بدەن بۆ ئەوەی چیتر سەرۆک نەتوانێت بەبێ گەڕانەوە بۆ کۆنگرێس بڕیاری سەربازیی هەستیار دژی ئێران بدات. 
ئەم بڕیارە وەک یەکەم هەوڵی فەرمیی دەسەڵاتی یاسادانانی ئەمریکا دەبینرێت بۆ کۆنتڕۆڵکردنی هەنگاوەکانی دۆناڵد ترەمپ لە بەڕێوەبردنی جەنگە دەرەکییەکاندا. پەرلەمانتارانی لایەنگری بڕیارەکە جەختیان کردەوە کە دەبێت واشنتن کۆتایی بەم ڕووبەڕووبوونەوەیە بهێنێت و ڕێگری لە پەرەسەندنی زیاتری جەنگەکە بگرێت کە زیانی گەورەی ئابووری و سیاسیی بە ئەمریکا گەیاندووە؛ بەمەش ترەمپ لەبەردەم فشارێکی یاسایی و سیاسیی تونددایە بۆ پاشەکشە لە بژاردە سەربازییەکان بەرانبەر بە تاران.