بەر لە سەردانەکەى، ئەمریکا ناوی ئەحمەد شەرعى لە لیستی تیرۆر دەرهێنا

پەیام 

بەر لە سەردانە چاوەڕوانكراوەكەی بۆ كۆشكی سپی، ئەمریكا ناوی سەرۆكی سووریای لە لیستی تیرۆری نێودەوڵەتی دەرهێنا.

لە ڕاگەیەنراوێكدا، تۆمی بیگۆت وتەبێژی وەزارەتی دەرەوەی ئەمریكا ئاشكرای كرد "وەزیری دەرەوە ناوی ئەحمەد شەرع سەرۆكی ئێستای سووریای لە لیستی سزاكانی تایبەت تیرۆری نێودەوڵەتیدا دەهێناوە".

ڕوونیشی كردەوە "وەزارەتی خەزێنەش لای خۆیەوە هەستاوە بە لادانی ناوی ئەنەس خەتاب وەزیری ناوخۆی سووریا لە لیستی سزاكانیدا". 

هەنگاوەكەی ئەمریكا لەكاتێكدایە بڕیارە ڕۆژی دووشەممەی ئەم هەفتەیە سەرۆكی سووریا سەردانی ئەمریكا بكات و لەگەڵ سەرۆكی وڵاتەكە كۆببێتەوە.

وتەبێژەكەی وەزارەتی دەرەوەی ئەمریكا ئاماژەی بەوەیش كردووە "ئەم بڕیارە پەیامێكی سیاسی بەهێزە كە سووریا بۆ قۆناغێكی نوێ دەگوازێتەوە و وەك دانپێدانانێكە بۆ ئەو پێشكەوتنانەی سەركردایەتی نوێی دیمەشق لە دوای ڕۆیشتنی ئەسەدەوە بەدەستی هێناوە". ئەو وتیشی: ئەمریكا بەردەوامی بە پشتیوانییەكانی بۆ هەوڵەكانی گەلی سووریا لەپێناو ئاشتی و سەقامگیری و بنیاتنانەوە دەدات.

دوو ڕۆژ لەمەوبەریش ئەنجوومەنی ئاسایشی نێودەوڵەتی ناوی سەرۆك و وەزیری ناوخۆی سووریای لە لیستی سزا نێودەوڵەتییەكان دەرهێنا و بەدوایشیدا یەكێتیی ئەورووپا و بەریتانیایش هەمان هەنگاویان گرتە بەر.