بۆ چاوخشاندنەوە بە تانەكانی هەڵبژاردن، كۆمسیۆن ژمارەیەك لیژنەی یاسایی پیکهێناوە

پەیام 

كۆمسیۆنی باڵای سەربەخۆی هەڵبژاردنەكان جەخت دەكاتەوە، ژمارەیەك لیژنەی یاسایی بە سەرۆكایەتی دادوەران و ڕاوێژكاران بۆ چاوخشاندنەوە بە تانەكانی هەڵبژاردن و یەكلاكردنەوەیان پێكهێنراون، ئاماژەی بەوەش داوە، هەر بڕیارێك، كە لە ئەنجومەنی كۆمسیارانەوە دەردەكرێت دەتوانرێت لە ماوەی سێ‌ ڕۆژدا لە ڕێكەوتی بڵاو كردنەوەیەوە، لەبەردەم دەستەی دادوەران تانەی لێ بدرێت. 

جومانە غەلای وتەبێژی كۆمسیۆن ڕایگەیاند: كۆمسیۆن ژمارەیەك لیژنەی لە فەرمانبەرانی یاسایی تایبەتمەند بە سەرۆكایەتیی ئەندامانی ئەنجومەنی كۆمسیۆن لە دادوەران و ڕاوێژكاران بەمەبەستی یەكلاكردنەوەی تانەكان دروست كردووە، جەختیشی كردەوە، ئەنجامی كۆتایی بە بڕیاری ئەنجومەنی كۆمسیاران و دوای كۆتاییهاتنی قۆناغی تانەكان ڕادەگەیەنرێت. 

غەلای ڕوونیشی كردەوە، دوای یەكلاكردنەوەی تانەكان، دادگای فیدراڵی ڕەزامەندی لەسەر ئەنجامەكان دەدات، ئاماژەی بەوەش دا، دەنگی كاندیدە دوورخراوەكان لە لیستی فەڕمی دەسڕێتەوە. 

دوای ڕاگەیاندنی ئەنجامە بەراییەكان، قۆناغی تانەی هەڵبژاردن بە هەنگاوێكی بنەڕەتی دادەنرێت، كە ڕێگە بە كاندیدان و حزبەكان دەدات لەپێناو گرەنتی شەفافی پڕۆسەكە و جێگیركردنی ئەنجامەكانی كۆتایی، ناڕەزایی لە ئەگەری هەر هەڵەیەك لە ئەنجامەكان و بڕیارەكانی هەڵبژاردن دەرببڕن.